Türkmenistanyň Saglygy goraýyş we derman senagaty ministrligi BMG-niň çagalar gaznasy (ÝUNISEF) bilen bilelikde ýurtdaky zenanlaryň we çagalaryň iýmitlenişindäki mikroelementler barada milli barlag geçirdiler. Bu barada Türkmenistanyň resmi metbugaty çarşenbe güni habar berdi.
Bu barlaglar iýmit mikroelementleriň ýetmezçiliginiň dürli görnüşleriniň ýaýramagyna we zenanlaryň hem-de çagalaryň arasynda degişli töwekgelçilik şertlerine baha berdi. Degişli barlag üçin maglumatlar Türkmenistanyň birnäçe sebitlerinden bolan 2 müň 672 oý hojalygyndan toplanyldy.
Bu hasabat iýmitleniş tejribesi, azyk önümleriň dürlüligi, ganazlygyň ýaýrawy hem-de ýod, foliý turşusy, demir, A we D witaminler ýaly örän möhüm mikroelementleriň ýetmezçiligi barada giňişleýin seljermäni özünde jemleýär.
Barlaglaryň netijeleri soňky ýyllarda iýmit ulgamynda uly ösüşiň gazanylandygyny görkezýär. Şeýle hem ol yzygiderli üns bermegi talap edýän esasy ugurlary ýüze çykarýar. Reproduktiw ýaşyndaky göwreli däl zenanlaryň we 6-dan 59 aý aralygyndaky çagalaryň arasynda ganazlyk derejesiniň 2011-nji ýylda iýmit mikroelementleri boýunça geçirilen barlaglar bilen deňeşdirilende azalandygyny aýratyn bellemek gerek.
Mundan başga-da, alnan netijeler öý hojalyklaryň ýodlaşdyrylan nahar duzuny we mikroelementler bilen baýlaşdyrylan uny ýeterlik möçberde has ýygjam ulanýandyklaryny görkezýär. Munuň özi nahar duzuny ählumumy ýodlaşdyrmak ölçgelerine, uny mikrolementler bilen baýlaşdyrmagyň halkara kadalaryna laýyk getirmegiň üstünlikli çözülýändigine şaýatlyk edýär.
Iýmitlenişiň gowulandyrylmagy, zenanlaryň we çagalaryň saglygynyň goralmagy Türkmenistanyň döwlet syýasatynyň baş ugry bolmagynda galýar.
