2025-nji ýylyň 11-nji iýulynda Duşenbe şäherinde Ýewropa Bileleşigi bilen Merkezi Aziýa döwletleriniň arasynda daşary syýasat edaralarynyň ýolbaşçylarynyň orunbasarlary derejesinde syýasat we howpsuzlyk meseleleri boýunça 12-nji ýokary derejeli dialog geçirildi. Bu barada Türkmenistanyň Täjigistan Respublikasyndaky Ilçihanasy habar berýär.
Duşuşyga Ýewropa Bileleşiginiň Daşary gatnaşyklar gullugynyň wekilleri, şeýle hem Türkmenistanyň, Gazagystanyň, Gyrgyzystanyň, Täjigistanyň we Özbegistanyň daşary işler ministrleriniň orunbasarlary gatnaşdylar.
Duşuşygyň barşynda sebit we sebitleýin hyzmatdaşlygyň ileri tutulýan ugurlary ara alnyp maslahatlaşyldy. Taraplar syýasy dialogy berkitmek we howpsuzlyk ulgamyndaky umumy wehimlere bilelikde garşy durmak meselelerine aýratyn üns berdiler. Gün tertibine serhet dolandyryşy, howanyň üýtgemegine uýgunlaşmak hem-de transmilli meselelerine garşy göreşmek ýaly ugurlar girizildi.
Bu duşuşykda Türkmenistana Türkmenistanyň Täjigistandaky Adatdan daşary we Doly ygtyýarly Ilçisi Aýmyrat Goçmyradow wekilçilik etdi. Diplomat Türkmenistanyň hemişelik Bitaraplyk ýörelgesine ygrarlydygyny, şeýle hem köptaraplaýyn hyzmatdaşlyk meýdançalarynda konstruktiw gatnaşyklara üns berýändigini tassyklady. Ol Ýewropa Bileleşigi bilen ynanyşmak gatnaşyklaryny berkitmegiň we anyk hyzmatdaşlygy ösdürmegiň möhümdigini nygtady.
Ýewropa Bileleşigi – Merkezi Aziýa dialogy sebitde durnuklylygy üpjün etmekde we özara düşünişmegi çuňlaşdyrmakda netijeli gurama hökmünde özüni görkezdi. Nobatdaky duşuşygyň netijeleri boýunça taraplar açyk gatnaşyklary dowam etdirmäge we özara gyzyklanma döredýän meseleler boýunça hyzmatdaşlygy giňeltmäge taýýardygyny tassykladylar.
_(1)30624-495x4352.jpg)
30635-90x604.jpg)
