Türkmen azyk öndürjileri “WorldFood Moscow 2025” halkara sergisine gatnaşarlar

Türkmenistanyň hususy önümçilik kompaniýalary 16-19-njy sentýabr aralygynda Russiýanyň paýtagtynda  geçiriljek “WorldFood Moscow 2025” halkara sergisine gatnaşarlar. Bu azyk senagatynda ýylda geçirilýän çäre dürli ýurtlardan, şol sanda Türkmenistandan sergä gatnaşyjylary özüne çekýär. Bu barada serginiň resmi web sahypasynda habar berilýär.

Şu ýylky “WorldFood Moscow” sergisi özüne dünýäniň 31 ýurdundan 1100-den gowrak kompaniýany jemlär. Olaryň arasynda Alžir, Braziliýa, Hytaý, Italiýa, Gazagystan, Türkiýe, Birleşen Arap Emirlikleri, Koreýa Respublikasy, Saud Arabystany we beýleki ýurtlaryň iri brendleri bar. Sergide azyk, içgi, konditer önümleri, organik we sagdyn iýmit, miwe-gök önümler, doňdurylan hem-de konserwirlenen azyklar, ýagly önümler we souslar ýaly dürli kategoriýalardaky täze önümler sergilener.

Birnäçe daşary ýurt kompaniýalary bilen bir hatarda, bu sergä “NesilCoffee”,  “Tibet Türkmen” we “Oguz Ýol” ýaly türkmen kompaniýalary gatnaşar. “Tibet Türkmen” kompaniýasy halkara bazarda “Balşeker”, “Kirpi” we “Kenton” haryt nyşanlary bilen tanalýar.

“NesilCoffee” Merkezi Aziýadaky iň iri kofe zawodlarynyň birini işe girizip, kofe önümlerini öndürýär. Süýji-köke uguryna ýöriteleşen “Tibet Türkmen” bolsa şokolad, ertirlikler, zefir we marmelad ýaly dürli önümleri bazara hödürleýär. Oba hojalygynda “Oguz Ýol” kompaniýasy Kaka etrabyndaky döwrebap ýyladyşhanalarynda pomidor, alma, şetdaly we üzüm ösdürip ýetişdirýär.

“WorldFood Moscow” sergisi öndürijiler, eksportçylar, importçylar we paýlaýjylar üçin halkara hyzmatdaşlygyny ösdürmäge, türkmen kompaniýalarynyň dünýä bazaryna çykmagyna we täze işewür gatnaşyklary ýola goýmagyna mümkinçilik berýär.

“Türkmenistan 2025-nji ýylyň 26–29-njy noýabr aralygynda “Istanbul Expo Center” merkezinde geçiriljek “Halal Expo 2025” halkara sergisinde hem milli pawilýony bilen gatnaşar.