Aşgabat şäherinde “Türkmenistanyň Bitaraplygynyň 30 ýyllygyna” atly Türkmenistanyň ýubileý medalyny we ýadygärlik nyşanlaryny gowşurmak dabaralary geçirildi. Bu barada şenbe güni Türkmenistanyň resmi metbugaty habar berdi.
Dabaralar Türkmenistanyň Jemgyýetçilik guramalarynyň merkezinde, Magtymguly adyndaky Türkmen döwlet uniwersitetinde, Türkmenistanyň Prezidentiniň Diwanynyň iş dolandyryş müdirliginiň edara binasynda hem-de Döwlet medeniýet merkeziniň Mukamlar köşgünde guraldy.
Döwlet sylaglary ýurduň ösüşine goşant goşan dürli ugurlaryň wekillerine — döwlet işgärlerine, ykdysadyýet, medeniýet, ylym we durmuş ulgamlarynda zähmet çekýän hünärmenlere gowşuryldy. Şeýle-de olaryň bitaraplyk ýörelgelerini berkitmekdäki hyzmatlary aýratyn nygtaldy.
Dabaralaryň dowamynda Birleşen Milletler Guramasynyň Baş Assambleýasy tarapyndan ykrar edilen Türkmenistanyň hemişelik bitaraplyk derejesiniň ýurduň daşary syýasatynyň möhüm ugry bolup durýandygy bellenildi. Bu syýasat parahatçylygy, durnuklylygy hem-de durnukly ösüşi üpjün etmäge gönükdirilendir.
Geçirilen sylag gowşurylyş dabaralary Halkara parahatçylyk we ynanyşmak ýylyna, şeýle-de Türkmenistanyň hemişelik bitaraplygynyň 30 ýyllygyna bagyşlanan çäreleriň maksatnamasynyň çäklerinde guraldy.
