Aşgabatda 16–18-nji sentýabr aralygynda geçirilen ”Ready4Trade Merkezi Aziýa: Hazarüsti ulag geçelgesi arkaly abadançylygy ösdürmek” taslamasynyň çäklerinde üç günlük okuw sapaklary geçirildi. Okuw sapagynyň çäklerinde Türkmenistanyň Döwlet gümrük gullugynyň hünärmenleri gümrük işinde töwekgelçilikleri dolandyrmakda emeli aň, ulag öwrenişi we uly maglumatlar seljermesini ulanmagyň mümkinçiliklerini öwrendiler. Bu barada Türkmenistanyň Ýewropa Bileleşiginiň wekilhanasy habar berdi.
Okuw sapagyna Türkmenistanyň Döwlet gümrük gullugynyň 30-dan gowrak hünärmeni gatnaşyp, ýükler barmaly ýerine gelmezinden öň maglumatlary işlemek we harytlar goýberilenden soňky gümrük gözegçiligi boýunça töwekgelçilikleri seljermegiň we bahalandyrmagyň döwrebap usullaryny öwrendiler.
Okuw sapagynyň amaly bölüminde gatnaşyjylar deklarasiýalary we ulag resminamalaryny seljerip, ýükler, ugurlar, iberijiler we ýük alyjylar baradaky maglumatlary deňeşdirdiler, töwekgelçilik ölçeglerini kesgitlediler hem-de goşmaça gözegçiligiň zerurlygy boýunça çözgüt kabul etdiler.
Töwekgelçilikleriň seljermesine esaslanýan gümrük gözegçiligini kämilleşdirmek Hazarüsti ulag geçelgesinde serhetüsti söwdany ýeňilleşdirmäge gönükdirilen esasy ugurlaryň biridir. Maglumatlary seljermegiň we alyş-çalşynyň döwrebap gurallaryny ösdürmek harytlaryň hereketini netijeli guramaga hem-de sebit ýurtlarynyň arasyndaky hyzmatdaşlygy pugtalandyrmaga ýardam berýär.
“Ready4Trade Merkezi Aziýa” taslamasy Türkmenistanda, Gazagystanda, Gyrgyzystanda, Täjigistanda we Özbegistanda durmuşa geçirilýän dört ýyllyk taslama bolup, Hazarüsti ulag geçelgesiniň netijeliligini ýokarlandyrmaga, serhetüsti amallary ýönekeýleşdirmäge we sebitleýin utgaşdyrmany pugtalandyrmaga gönükdirilendir.
