Eýran Yslam Respublikasynyň Türkmenistandaky Ilçihanasynyň medeniýet merkezinde anna güni Eýran Yslam Respublikasynyň Beýik Lideri Aýatolla Seýed Ali Hoseýni Hameneýini, serkerdeleri we Watan şehitlerini, Minap şäheriniň çagalaryny hatyralamak çäresi geçirildi.
Çärä Eýranyň Türkmenistandaky Adatdan daşary we Doly ygtyýarly ilçisi Ali Mojtaba Ruzbehani, ýurduň Aşgabatdaky ilçihanasynyň Medeniýet meseleleri boýunça geňeşçisi Abdolreza Abbas, Pakistanyň we Täjigistanyň Türkmenistandaky ilçileri, Pakistanyň Türkmenistandaky Ilçihanasynyň harby wekili, Türkiýäniň Türkmenistandaky Ilçihanasynyň medeniýet meseleleri boýunça geňeşçisi, Russiýanyň Türkmenistandaky Ilçihanasynyň ikinji sekretary Wadim Ýakowlew, Eýranyň Türkmenistandaky ýaşaýjylary, pars dilini öwrenijiler, myhmanlar we köpçülikleýin habar beriş serişdeleriniň wekilleri gatnaşdylar.
Eýranyň Türkmenistandaky ilçisi Ali Mojtaba Ruzbehani ýurduň Aşgabatdaky Medeniýet merkezinde geçirilýän Eýranyň merhum lideri – Ymam Hameneýini hatyralamak çäresine gatnaşýandyklary üçin myhmanlara tüýs ýürekden minnetdarlygyny bildirdi.
Çärede ýurduň Aşgabatdaky ilçihanasynyň Medeniýet meseleleri boýunça geňeşçisi, Russiýanyň Türkmenistandaky Ilçihanasynyň ikinji sekretary çykyş etdiler we pars dilini öwrenijiler goşgylary ýerine ýetirdiler.
