Türkmen habarçylary Türkiýede zeýtun ýagynyň tagamy we taryhy bilen tanyşdylar

Türkiýäniň Çanakkale we Balıkesir welaýatlaryna guralan tanyşdyryş saparynyň ilkinji gününde Türkmenistanyň köpçülikleýin habar beriş serişdeleriniň wekilleri Çanakkale welaýatynyň Küçükkuyu şäherçesinde ýerleşýän Adatepe zeýtun ýagy muzeýine baryp gördüler. Şeýle hem olar Balıkesir welaýatynyň Edremit etrabynyň Güre deňiz kenarynda geçirilen zeýtun ýagyny dadyp görmek üçin III Edremit festiwalyna gatnaşdylar.

Adatepe zeýtun ýagy muzeýi 2001-nji ýylda açylyp, Türkiýede bu ugurda döredilen ilkinji muzeýleriň biridir. Küçükkuyu şäherçesinde ýerleşýän muzeý öňki sabyn öndürilýän binada döredilip, zeýtun ýagynyň öndüriliş taryhyny we däp bolan usullaryny tanyşdyrýar. Bu ýerde gadymy presler, zeýtunlary ýygnamakda ulanylan gurallar, ýagy daşamak we saklamak üçin niýetlenen gaplar ýaly taryhy eksponatlar görkezilýär. Muzeýe gelýänler sebitiň zeýtunçylyk däpleri we zeýtun ýagynyň önümçilik aýratynlyklary bilen hem tanşyp bilýärler.

Şeýle hem türkmen žurnalistleri Güre deňiz kenarynda geçirilen III Edremit zeýtun ýagy dadyp görmek festiwalyna hem gatnaşdylar. Festiwal 2026-njy ýylyň 9–11-nji oktýabrynda geçirilip, sebitiň zeýtunçylyk medeniýetini we ýerli önümlerini giňden tanatmaga gönükdirildi. Festiwalyň çäklerinde zeýtun ýagynyň dürli görnüşlerini dadyp görmek, ýerli öndürijileriň önümleriniň sergileri, gastronomik tanyşdyrylyşlar, aşpezleriň çykyşlary, ussatlyk sapaklary we konsertler ýaly çäreler geçirildi. Festiwal Edremit sebitiniň zeýtun ýagyny we onuň ýerli medeniýetdäki ornuny görkezýän çäreleriň biri bolup durýar.

Şol gün türkmen habarçylary üçin Güre deňiz kenaryna gezelenç hem gurnaldy. Güre deňiz kenary Kazdag daglarynyň eteginde ýerleşip, tebigy gözelligi, deňiz dynç alşy we termal çeşmeleri bilen giňden tanalýar. Zeýtunçylyk däpleri, ýerli gastronomiýa we tebigy baýlyklar bu sebitiň syýahatçylyk mümkinçilikleriniň iň möhüm bölekleriniň biridir.

Türkmenistanyň köpçülikleýin habar beriş serişdeleriniň wekilleriniň muzeýe baryp görmegi we festiwala gatnaşmagy olara sebitiň taryhy-medeni mirasy, ýerli önümçiligi hem-de syýahatçylyk mümkinçilikleri bilen ýakyndan tanyşmaga uly mümkinçilik berdi.