Türkmenistanyň Prezidenti Serdar Berdimuhamedowyň baştutanlygynda Köpetdagyň etegindäki Saglyk ýolundan köpçülikleýin ýöriş çäresi geçirildi. Bu barada Türkmenistanyň resmi metbugaty şenbe güni habar berdi.
Çäräni geçirmek teklibi Ministrler Kabinetiniň 25-nji oktýabrda geçirilen mejlisinde Türkmenistanyň başlangyjy bilen BMG-niň Baş Assambleýasynyň ýakynda kabul eden “Birleşen Milletler Guramasynyň oýunlary” atly Kararnamany goldamak maksady bilen öňe sürüldi.
Ir säher bilen köpçülikleýin ýörişiň badalga alýan ýerine Mejlisiň Başlygy, Ministrler Kabinetiniň Başlygynyň orunbasarlary, ýurdumyzyň harby we hukuk goraýjy edaralarynyň, ministrlikleriň, pudaklaýyn dolandyryş edaralarynyň, jemgyýetçilik guramalarynyň, köpçülikleýin habar beriş serişdeleriniň, Türkmenistandaky diplomatik wekilhanalaryň, halkara guramalaryň ýolbaşçylarydyr wekilleri, ýokary okuw mekdepleriniň rektorlary hem-de talyplar geldiler.
Türkmenistanyň Prezidenti ýörişe badalga berip, ilkinji bolup Saglyk ýolundan geçmäge başlady. Beýlekiler hem sagdyn durmuş ýörelgelerine ygrarlylygyň nyşany hökmünde asylly göreldä eýerdiler.
Köpçülikleýin ýörişden soň, halkara derejede Türkmenistanyň abraýyny belende göteren türgenleri sylaglamak dabarasy geçirildi. Diplomatlaryň we döwlet gullukçylarynyň arasynda Saglyk ýolundan geçmek boýunça bäsleşikleriň ýeňijileri hem sylaglanyldy. Türkmenistanyň döwlet Baştutany sportuň halkara hyzmatdaşlygy we halklaryň arasynda dostlugy pugtalandyrmaga ýardam edýändigini nygtady.
Soňky ýyllarda Türkmenistan döwrebap sport desgalaryny gurmak arkaly sport düzümlerini işjeň ösdürmek bilen bir hatarda, sportuň milli görnüşlerini giňden wagyz edýär. Türkmen türgenleriniň ýakynda gazanan üstünlikleri, şol sanda Aziýa we dünýä çempionatlarynda gazanan medallary bu ugurda Türkmenistanyň halkara giňişliginde eýeleýän ornuny pugtalandyrdy.
Dzýudo boýunça “Uly tuwulga”, agyr atletika boýunça dünýäniň Kubogy we beýleki halkara ýaryşlarda, şol sanda kuraş, kikboks we parapauerlifting çepionatlarynda türkmen türgenleriniň gazanan üstünlikleri aýratyn bellenildi.
Erkin göreş boýunça 20 ýaşa çenli türgenleriň arasynda geçirilen dünýä çempionatynda altyn medala mynasyp bolan Alp Arslan Begenjowa hem-de agyr atletika boýunça ýaşlaryň arasynda geçirilen dünýä çempionatynda altyn medala mynasyp bolan Şahzadbek Matýakubowa Türkmenistanyň Prezidentiniň adyndan “Toyota Camry V6” kysymly ýeňil awtoulaglar sowgat berildi.
Çäräniň ahyrynda türgenler sporty goldaýandyklary üçin Türkmenistanyň Prezidenti Serdar Berdimuhamedowa we türkmen halkynyň Milli Lideri Gurbanguly Berdimuhamedowa hoşallyk bildirip, geljekde hem dünýä giňişliginde Türkmenistana mynasyp wekilçilik etjekdiklerine ynandyrdylar.
