Aşgabatly hususy telekeçi Jennet Garlyýewa düýe ýüňünden mata öndürmek boýunça telekeçilik işinde gadymy senetçilik däplerini häzirki zaman tehnologiýalar bilen üstünlikli baglanyşdyrýar.
Çarşenbe güni çap edilen “Neýtralnyý Türkmenistan” gazetinde habar berlişine görä, özbaşdak güýmenje hökmünde başlanan zenan telekeçiniň bu işi üstünlikli ösýän maşgala kärhanasyna öwrülipdir. Ony bu işe ejesi Şasenemiň pikirleri ruhlandyrypdyr.
Irki döwürlerde türkmeniň ak öýlerinde ulanylan, agaçdan ýasalan gadymy dokma esbaplaryny ulanmak arkaly Jennet tebigy düýe ýüňünden ajaýyp matalary döredip, dokmaçylyk däplerini mynasyp dowam etdirýär. Ýeke örküçli düýelerden ýüň almakdan mata dokamaklyga çenli önümçiligiň ähli tapgyry elde ýerine ýetirilýär. Goňur, sary we çypar öwüsýän tebigy reňkler hem-de çig malyň ekologiýa taýdan arassalygy onuň öndürýän önümleriniň esasy aýratynlygy bolup durýar. Matalar boýalanda naryň miwesi ýaly diňe tebigy serişdelerden peýdalanylýar.
2018-nji ýylda telekeçilik işiniň esaslandyrylan wagtyndan bäri önümçilik düýpli giňeldildi. Häzirki wagtda maşgala agzalaryndan daşary bu işe oba ýerlerinden hem köpsanly öý hojalykçy zenanlar gatnaşýarlar. Döwrebap önümçilik enjamlary bolsa harytlaryň taýýarlanylyşyny çaltlandyryp, olaryň hiliniň ýokary bolmagyny üpjün edýär. Senetçiler her aýda bu matanyň 100 metre çenli möçberini öndürýärler. Önümleriň görnüşleriniň hatarynda diňe bir penjek, ýeňsiz we şarf ýaly lybaslar däl, eýsem, ýorgan-düşek, ýassyk ýaly öý-hojalyk harytlary hem bar.
Jennet Garlyýewanyň öndürýän önümlerine daşary ýurtlarda hem uly isleg bildirilýär. Onuň harytlary Italiýa, Fransiýa we Niderlandlar ýaly Ýewropa Bileleşiginiň ýurtlaryna iberilýär. Bu ýurtlarda türkmen matalary ýokary baha mynasyp boldy.
Jennet Garlyýewanyň telekeçilik işini esasy maksady türkmen halkynyň medeni däplerini aýawly saklamakdan, ösdürmekden, milli bezeg usullaryny wagyz etmekden hem-de öz önümleri bilen medeni alyşmalary üpjün etmekden ybaratdyr. Telekeçi zenan geljekde dokmaçylyk sungatyny öwredýän, düýe ýüňünden matalary döretmegi ähli isleg bildirýänlere tanyşdyrýan okuw sapaklaryny açmagy meýilledirýär.
