Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow şenbe güni Arkadag şäherine iş saparyny amala aşyryp, şäheriň ikinji tapgyrynyň çäklerinde guruljak desgalaryň taslamalary bilen tanyşdy. Bu barada Türkmenistanyň resmi metbugaty habar berýär.
Saparynyň dowamynda Gurbanguly Berdimuhamedow dürli maksatly binalaryň şekillerini, ulag desgalaryny döwrebaplaşdyrmak boýunça taslamalary, ornaşdyrylmagy göz öňünde tutulýan Gün panelleriniň görnüşlerini synlady. Gurluşygyň ekologiýa taraplaryna we şäher gurşawynyň gözelligine aýratyn üns berildi.
Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy Derýageldi Orazow gurluşyk meýdançalarynda işleriň barşy, şol sanda täze desgalaryň gurluşy we olaryň çäkleriniň abadanlaşdyrylyşy barada hasabat berdi. Ahalteke atlar şaýolunyň ýol gurluşygy, metjit, demir ýol wokzaly we awtomenzil hem-de döwrebaplaşdyryş işleri geçiriljek Gökdepe şaýolundaky köpri görkezilen taslamalaryň hatarynda boldy.
Türkmen halkynyň Milli Lideri binagärlik we bezeg çözgütleri boýunça birnäçe maslahatlary berdi hem-de ýokary hil ülňüleriniň berjaý edilmeginiň, taslamalaryň gurluşyklarynyň ýerli tebigy şertlere laýyk getirilmeginiň möhümdigini belledi.
Türkmenistanyň Halk Maslahatynyň Başlygy gurluşykda sanly tehnologiýalary we “akylly” işläp taýýarlamalary ulanmagyň hem-de şäheriň ösüşine maýa goýumlary çekmegiň zerurdygyna ünsi çekdi.
Saparyň çäklerinde şeýle hem Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komiteti bilen Aziýanyň ösüş bankynyň (AÖB) arasynda Özara düşünişmek hakynda Ähtnama gol çekildi.
