Türkmenistanyň Senagatçylar we telekeçiler birşemesiniň agzasy “Nurana dost” kärhanasy Daşoguz welaýatynyň Şabat etrabynyň Diýar geňeşliginiň çäginde alty sany täze ýaşaýyş jaýynyň gurluşygyny tamamlap gelýär. Bu ýerde ýakyn wagtda 3 sany 16 öýli, 2 sany 24 öýli we 1 sany hem 8 öýli ýaşaýyş jaýlaryny ulanmaga bermek meýilleşdirilýär diýlip, “Daşoguz habarlary” gazetiniň penşenbe günündäki sanynda habar berilýär.
Degsalaryň gurluşyk işleri telekeçi Berdimuhammet Garajanowyň ýolbaşçylygynda alnyp barylýar. Telekeçiniň bellemegine görä, gurluşykda onlarça hünärmen iş alyp barýar. Olar özleriniň çekýän zähmeti bilen desgalaryň ýokary hil derejesini we öz wagtynda tamamlanmagyny üpjün edýärler. Tamamlaýjy tapgyr içki bezeg we ýanaşyk ýerleri abadanlaşdyrmak boýunça işleri öz içine alýar.
Döredilen wagtyndan bäri “Nurana dost” kärhanasy Daşoguz welaýatynda birnäçe möhüm taslamalary durmuşa geçirdi. Gülüstan we Adalat ilatly ýerlerindäki ýaşaýyş jaýlar we durmuş maksatly desgalar hem-de Saparmyrat Türkmenbaşy we Şabat etraplarynda gurlan binalar şolaryň hataryndadyr. Ähli gurlan desgalar ýokary ygtybarlylygy, oýlanyşykly düzülen infrastrukturasy we häziki döwrüň isleglerine laýyk gelýändigi bilen tapawutlanýar. Häzirki döwürde kärhanada 200-e golaý hünärmen zähmet çekýär.
Onuň aýtmagyna görä, kärhananyň öňünde ýakyn wagtda ýene-de birnäçe desgalaryň gurluşygyna başlamak meýilleşdirilýär.
Köneürgenç etrabynyň Täze ýol geňeşliginiň çäginde hem şäher we ilatly ýerleriň häzirki zaman ösen islegleri göz öňünde tutulyp taslamalaşdyrylan döwrebap şäherçäniň gurluşygy alnyp barylýar.
