Türkmenistanyň Ylymlar akademiýasynyň Halkara ylmy we tehnologik parkynyň biotehnologiýa laboratoriýasy gyzyl üzümiň “Giçki Wawilow” görnüşinden güýçli antioksidant bolan resweratroly almak boýunça tehnologiýany işläp taýýarlady. Bu oýlap tapyşa bolan awtorlyk hukugy Türkmenistanyň Maliýe we ykdysadyýet ministrliginiň Intellektual eýeçilik boýunça döwlet gullugy tarapyndan bellige alyndy. Bu barada Türkmenistanyň resmi metbugaty penşenbe güni habar berdi.
Barlagyň dowamynda alymlar resweratroly üzümiň dürli böleklerinden – şol sanda kallusdan, miweleriň gabygyndan, şahajyklaryndan, tohumlaryndan we galyndylaryndan alyp gördüler. Esasy görnüşden başga-da, synagda “Terbaş”, “Aşgabat”, “Taýfi”, “Kaberne” we “Garaüzüm” ýaly üzüm görnüşleri hem ulanyldy. Wegetasiýa döwrüniň ahyrynda ýygnalan bu üzüm görnüşleriniň ýapraklaryndan ýokary antioksidant täsirli fenol birleşmeleri alyndy.
“Giçki Wawilow” görnüşi 1970–1978-nji ýyllarda Türkmenistanda ýerleşýän WNIIR-nyň synag stansiýasynda “Içkimar” we “Janjal gara” görnüşlerini sapmak arkaly döredilipdir. Onuň şahalary uly we konus görnüşinde bolup, miweleri uzyn-silindr görnüşlidir.
Resweratrol tebigy antioksidant hökmünde tanalýar we onuň ýürek-damar ulgamyna we ýada täsiriniň oňynlygy ylmy taýdan subut edilendir. Hünärmenleriň bellemegine görä, ol deriniň garramagyny haýalladyp bilýär, kollageniň döwülmeginden goraýar we onkologiýa keselleriniň öňüni almakda hem möhüm orny eýeläp biler. Üzümiň beýleki böleklerinde-de saglyga peýdaly bolan polifenollar, ellag turşylygy we C witamini ýaly düzüm bölekleri bardyr.
