Eksport etmekde möhüm netijelere ýeten "Haýyrly Senagat" hususy kärhanasy "Pommo" brendiniň halkara bazarlardaky ösüşinde täze tapgyry açdy. Bu hususy kärhana 16–17-nji iýulda Tbiliside geçirilen halkara forumyň we serginiň çäklerinde Gruziýanyň öňdebaryjy importçylary, distribýutorlary hem-de söwda ulgamlarynyň wekilleri bilen birnäçe strategik gepleşikleri geçirdi.
Gepleşikleriň netijesinde "Pommo" haryt nyşanly ýokary hilli pomidorlary Gruziýanyň bazaryna has köp möçberde ibermek boýunça özara ylalaşyklar gazanyldy. Bu ylalaşyklar "Haýyrly Senagat" hususy kärhanasynyň eksport mümkinçiliklerini pugtalandyrmakda möhüm ädim bolup, türkmen önümlerine daşary ýurtly hyzmatdaşlaryň ynamynyň artýandygyny görkezýär.
"Haýyrly Senagat" hususy kärhanasy meýdany 25 gektara çenli ýetýän häzirki zaman agro-senagat toplumyna eýedir. Bu ýerde häzirki zaman oba hojalyk tehnologiýalary hem-de köp basgançakly hil gözegçilik ulgamy arkaly "Pommo" brendiniň ýokary hilli pomidorlary ösdürilip ýetişdirilýär.
Hususy kärhananyň wekilleriniň bellemegine görä, iri önümçilik we eksport taslamalarynyň üstünlikli durmuşa geçirilmegi Türkmenistanyň hususy telekeçiligi goldamak, agro-senagat toplumyny ösdürmek hem-de Türkmenistanyň eksport kuwwatyny pugtalandyrmak boýunça alyp barýan yzygiderli syýasatynyň netijesidir. Ýerli telekeçiligi ösdürmekde we türkmen önümleriniň halkara bazarlaryna ornaşdyrmakda döredilýän amatly şertler üçin "Haýyrly Senagat" hususy kärhanasy Türkmenistanyň Prezidenti Serdar Berdimuhamedowa öz hoşallygyny bildirýär.
Bu hususy kärhananyň "Pommo" brendi eýýäm Gruziýanyň bazarynda öz ornuny tapdy. Diňe 2025–2026-njy ýyllaryň möwsüminde hususy kärhana Gruziýa takmynan 1 million kilogram pomidor eksport etdi. Gazanylan täze ylalaşyklar eksport möçberini mundan beýläk hem ep-esli artdyrmaga we brendiň içerki bazardaky ornuny hem has-da giňeltmäge mümkinçilik döreder.
Täze iş ugurlaryny ösdürmekde möhüm meýdança bolan türkmen-gruzin işewürlik forumynyň çäklerinde, Gruziýanyň Söwda-senagat edarasynyň prezidenti bilen geçirilen duşuşykda taraplar dokma önümleri babatda hyzmatdaşlygyň geljegini we türkmen önümleriniň Gruziýanyň bazaryna iberilişini giňeltmegiň mümkinçiliklerini hem ara alyp maslahatlaşdylar.
"Haýyrly Senagat" hususy kärhanasy oba hojalyk önümleri bilen bir hatarda, Türkmenistanda öndürilýän dokma önümleriniň eksportyny hem işjeň ösdürýär. Kärhana daşary ýurtlara pagta ýüplügini, dürli görnüşli matalary we taýýar dokma önümlerini iberip, türkmen öndürijileriniň halkara bazarlardaky ornuny pugtalandyrýar.
Halkara sergide gazanylan netijeler daşary ýurtly hyzmatdaşlaryň Türkmenistanyň önümlerine bolan gyzyklanmasynyň artýandygyny tassyklaýar we "Haýyrly Senagat" hususy kärhanasy üçin eksporty has-da giňeltmekde täze mümkinçilikleri açýar. Kärhana önümleriniň eksport meýdançasyny yzygiderli giňeldip, halkara işewürlik gatnaşyklaryny ösdürmegi hem-de "Pommo" brendini Türkmenistanyň oba hojalyk önümleriniň tanalýan eksport brendleriniň biri hökmünde ilerletmegi dowam etdirýär.
"Haýyrly Senagat" hususy kärhanasy bilen habarlaşmak üçin:
Web sahypasy: www.hayyrlysenagat.com
Elektron salgysy: info@hayyrlysenagat.com
Salgysy: Aşgabat şäheriniň G.Kuliýew köçesiniň 15-nji jaýy
Telefon/faks belgileri: +993 12 71-38-10 / 11
