Malaýziýanyň Kuala-Lumpur şäherinde sişenbe güni geçirilen AFK-nyň ikinji Çempionlar ligasynyň 2026/2027 möwsüminiň toparlaýyn tapgyrynyň bije çekilişiniň netijesinde Türkmenistanyň häzirki çempiony “Arkadag” futbol toparynyň garşydaşlary belli boldy. Bu barada Aziýanyň Futbol Konfederasiýasy (AFK) habar berýär.
“Arkadag” futbol topary “B” toparçada Birleşen Arap Emirlikleriniň “Al-Jazira”, Eýranyň “Gol Gohar” we Bahreýniň “Al-Muharraq” toparlary bilen duşuşar. Türkmen futbol toparynyň toparçadaky duşuşyklarynyň seneleri we geçiriljek ýerleri barada maglumat soňra mälim ediler.
Ýaryşyň toparlaýyn tapgyrynda dört toparçadan ybarat sekiz topara bölünen jemi 32 topar çykyş eder. Merkezi Aziýa sebitinden “Arkadag” toparyndan başga-da “A” toparçada ýer alan Özbegistanyň “Nasaf” topary hem gatnaşar.
Aziýanyň futbol toparlaýyn ýaryşlarynyň arasynda ähmiýeti boýunça ikinji ýerde durýan AFK-nyň ikinji Çempionlar ligasynyň toparlaýyn tapgyry 2026-njy ýylyň 15-nji sentýabrynda başlanyp, ýaryşyň final duşuşygy 2027-nji ýylyň 15-nji maýynda geçiriler.
