“Älem açar” hususy kärhanasy Daşoguz welaýatynda bina edilýän hassahanany ulanyşa girizmäge taýynlaýar. Welaýat merkeziniň Şagadam köçesiniň ugrunda açyljak iki gatly hassahana bu ýerde ýerleşýän jemgyýetçilik infrastrukturasynyň üstüni ýetirer diýlip “Türkmenistan: Altyn Asyr” internet neşirinde aýdylýar.
Täze hassahanada bejeriş-dikeldiş hyzmatlary bilen bir hatarda keselleri anyklamaga niýetlenen bölümler ýerleşdiriler. Merkezde dürli ugurlara niýetlenen aýratyn otaglar, laboratoriýalar, dolandyryş otaglary we dermanhana bolar.
Soňky ýyllarda Daşoguz welaýatynda 14 hassahana, 20-den gowrak saglyk merkezleri we saglyk öýleri bina edildi we täzeden dikeldildi.
Häzirki wagtda Türkmenistanyň demirgazyk welaýatynda 450 orunlyk köpugurly hassahananyň we 150 orunlyk onkologiýa klinikasynyň gurluşygy dowam edýär.
