Anna güni wideokonferensiýa arkaly Türkmenistan bilen Fransiýa Respublikasynyň Daşary işler ministrlikleriniň arasyndaky geňeşmeleriň dördünji tapgyry geçirildi.
Onlaýn geňeşmelere Daşary işler ministriň orunbasary Wepa Hajiýew hem-de Fransiýa Respublikasynyň Ýewropa we daşary işler ministrliginiň Kontinental Ýewropa departamentiniň direktory Frederik Mondoloni ýolbaşçylyk etdiler.
Geňeşmeleriň barşynda taraplar Covid-19 bilen bagly alnyp barylýan çäreler boýunça pikir alyşdylar. Şeýle hem iki ýurduň arasyndaky syýasy-diplomatik we söwda-ykdysady hyzmatdaşlygyň wajyp meseleleri maslahatlaşyldy.
Diplomatlar halkara guramalaryň, hususan-da BMG-niň, ÝB-niň we ÝHHG-nyň çäklerinde iki ýurduň oňyn hyzmatdaşlygy barada belläp geçdiler. Fransuz tarapy Türkmenistanyň sebit we halkara başlangyçlarynyň, hususan-da sebitde parahatçylygy, howpsuzlygy we durnuklylygy saklamak boýunça başlangyçlarynyň wajyplygyny belledi.
Gepleşikleriň dowamynda ykdysady hyzmatdaşlyk boýunça hökümetara türkmen-fransuz toparynyň mejlisleriniň yzygiderli geçirilmeginiň möhümdigi, şol sanda iş toparlarynyň işiniň işjeňleşdirilmegi barada bellenip geçildi.
Şeýle-de medeni-ynsanperwer ulgamdaky ikitaraplaýyn gatnaşyklaryň ösüşi barada aýdyp, söhbetdeşler ýokary okuw jaýlarynyň arasyndaky hem-de arheologiýa pudagyndaky hyzmatdaşlyga üns çekdiler. Mundan başga-da, taraplar kosmos we suw ulgamlaryndaky hem-de Türkmenistanda fransuz dilini ýaýbaňlandyrmak ugrundaky hyzmatdaşlygyň geljekki mümkinçilikleri barada pikir alyşdylar.
