Statistika baradaky döwlet komitetiniň başlygy Sylap Welbegow anna güni geçirilen Türkmenistanyň Milli Geňeşiniň Halk maslahatynyň nobatdan daşary mejlisiniň dowamynda ministrlikler we pudaklaýyn dolandyryş edaralar tarapyndan 2021-nji ýylda meýilnamalaýyn görkezijileriň ýerine ýetirilişi barada hasabat berdi.
Türkmenistanyň Prezidenti Gurbanguly Berdimuhamedowyň başlyklyk etmeginde geçirilen mejlise Türkmenistanyň Milli Geňeşiniň Halk maslahatynyň saýlanan agzalary, Mejlisiň deputatlary, döwlet häkimiýet edaralarynyň, syýasy partiýalaryň we jemgyýetçilik guramalaryň ýolbaşçylary, welaýatlaryň, etraplaryň hem-de şäherleriň häkimleri, halkyň hormatly ýaşululary, ilatyň ähli gatlaklarynyň wekilleri gatnaşdylar.
Welbegowyň hasabatynda bellenilmegine görä, ýylyň netijeleri boýunça elektrik energiýasynyň önümçiligi 11,6%, onuň eksporty bolsa 36,4% artdy. Ýurt boýunça şol döwürde benziniň öndürilişi 0,5%, çalgy ýaglarynyň öndürilişi 7,8%, sementiň öndürilişi bolsa 4,5% ýokarlandy.
Nah ýüplükleriň we matalaryň öndürilişi degişlilikde 24,8% we 6,4% artdy.
Oba hojalygy pudagyna ünsi çekip, Welbegow geçen ýyl öndürilen gök önümleriň 2020-nji ýyl bilen deňeşdirilende 5%, miwe we ir-iýmişleriň öndürilişiniň 2,6%, ýeralmanyň öndürilişiniň 9,2%, diri agramdaky etiň öndürilişiniň 0,9%, süýdüň öndürilişiniň 0,9% artandygyny aýtdy.
2021-nji ýylyň netijeleri boýunça çörek we çörek önümleriniň öndürilişi 6,3%, unaş önümleriniň öndürilişi 4,1%, süýji-köke önümleriniňki bolsa 7,3% ýokarlandy.
Hasabat döwründe gaýtadan işlenen hem-de gaplanan balyk we balyk önümleriniň öndürilişi 2,1% we şöhlat önümleriniň öndürilişi 9,8% ýokarlandy.
“Hasabat döwründe ykdysadyýetiň döwlete dahylsyz ulgamlarynda hem ösüşler gazanyldy. Plastmassadan edilen we aýna süýümli turbalaryň öndürilişi 33,2%, gök önümleriň öndürilişi 5,2%, miwe we ir-iýmişleriň öndürilişi 7,5%, ýumurtganyň öndürilişi 1,2% köpeldi” diýip, Statistika baradaky döwlet komitetiniň başlygy belledi.
Şeýle-de ýylyň netijeleri boýunça 83 milliard 773 million kubmetr tebigy gaz çykarylyp, onuň eksporty 2020-nji ýyl bilen deňeşdirilende 34,8% artdy.
Statistika baradaky döwlet komitetiniň başlygy “2022-nji ýylda Türkmenistanyň ilatynyň we ýaşaýyş jaý gorunyň uçdantutma ýazuwyny geçirmegiň meýilnamasyna” laýyklykda, 2021-nji ýylyň 17-27-nji dekabry aralygynda sanly tehnologiýalary ulanmak arkaly synaglaýyn ilat ýazuwynyň geçirilendigi barada hem hasabat berdi.
