Türkmen–hytaý söwda-ykdysady forumy

Türkmenistanyň Söwda-senagat edarasy we Hytaýyň Daşary ýurtlarda ösüş assosiasiýasy (CODA) “Talwas Ýoly” paýdarlar jemgyýetiniň hem-de “Oguz Forum & Expo” toparynyň goldawy bilen “Söwda-ykdysady hyzmatdaşlygyň täze mümkinçilikleri” atly türkmen-hytaý söwda-ykdysady forumyny geçirer. Çäre 2026-njy ýylyň 28–30-njy apreli aralygynda Aşgabat şäherindäki Söwda-senagat edarasynda bolar.

Forumyň maksady — iki ýurduň işewürleriniň aragatnaşygyny ösdürmek, täze hyzmatdaşlyk mümkinçiliklerini açmak we oba hojalygyndan başlap energetika, gurluşyk, ulag-logistika, IT we beýleki esasy senagat ugurlarynda bilelikdäki taslamalary ilerletmekdir.

Forumda täze gurluşyk we önümçilik mümkinçilikleri, energetika hem-de uglewodorod pudagyndaky taslamalar, ulag we logistika ulgamynda häzirki zaman çözgütler, oba hojalygynda innowasion tehnologiýalar, IT we sanly ösüş bilen baglanyşykly meseleler ara alnyp maslahatlaşylar.

Azyk howpsuzlygy, ekologiýa taýdan arassa önümçilik, täze tehnologiýalar we multimodal ulag geçelgeleri ýaly mowzuklar hem aýratyn üns merkezinde bolar. Türkmenistan halkara ulag geçelgeleriniň möhüm merkezi hökmünde forumda öz mümkinçiliklerini tanyşdyrar. Gatnaşyjylar multimodal ulag geçelgelerini ösdürmek we sebitleýin logistika baglanyşyklary bilen baglanyşykly taslamalar bilen tanyşyp bilerler.

Foruma Hytaýyň iri birleşikleriniň ýolbaşçylary, döwlet wekilleri, öňdebaryjy kompaniýalaryň ýolbaşçylary hem-de dürli pudaklardan takmynan 500 wekiliň gatnaşmagyna garaşylýar. Bu giň möçberli çäräniň täze hyzmatdaşlyk taslamalary üçin esas döretmegine garaşylýar.