Daşkentde Merkezi Aziýanyň zenan media hünärmenleriniň II halkara konferensiýasy geçirildi

Daşkent şäherinde 14–15-nji sentýabr aralygynda Merkezi Aziýanyň zenan media hünärmenleriniň II halkara konferensiýasy geçirildi. Oňa Gazagystandan, Gyrgyzystandan, Täjigistandan, Türkmenistandan we Özbegistandan 100-den gowrak žurnalistlar, redaktorlar, media menejerleri we blogerlar gatnaşdy.

Çäräni Özbegistan Respublikasynyň Häzirki zaman žurnalistikasyny ösdürmek merkezi (MJDC) gurady. Milli hyzmatdaşlar hökmünde Özbegistan Respublikasynyň Prezidentiniň Administrasiýasynyň ýanyndaky Media materiallary taýýarlaýyş merkezi we Milli köpçülikleýin habar beriş serişdelerini ösdürmek we goldamak boýunça jemgyýetçilik gaznasy çykyş etdiler. Sebitleýin esasy hyzmatdaş hökmünde Täjigistanyň Zenan žurnalistleriniň milli koalisiýasy çykyş etdi.

Konferensiýanyň ilkinji güni sanly howpsuzlyk, neşirleriň hukuk taýdan goragy we media biznesiniň durnuklylygy meselelerine bagyşlandy. Ikinji gün amaly görnüşde geçirilip, redaksiýalary ösdürmek meselesine üns berildi. Gazagystandan Aýsan Aşim we Gyrgyzystandan Nurjamal Janibekowa “Redaksiýany durnukly dolandyrmak: biznes modelleri we krizis döwründe liderlik” atly okuw maslahatyny geçirip, redaksiýalary dolandyrmak, durnukly toparlary döretmek we girdeji çeşmelerini diwersifikasiýalaşdyrmak boýunça tejribelerini paýlaşdylar. 25 ýaşynda öz habar serişdesini döreden Aýsan Aşim durnukly biznes modelini kemala getirmek baradaky tejribesini gürrüň berdi. Gyrgyzystanyň “Başta” neşiriniň esaslandyryjylarynyň biri Nurjamal Janibekowa bolsa öz redaksiýasynyň işini dowam etdirmekde peýdalanýan biznes modeli barada aýtdy.

Konferensiýanyň ahyrynda redaksiýalaryň ýolbaşçylary we Merkezi Aziýanyň zenan žurnalistleri koalisiýasynyň Dolandyryş geňeşi gender aýratynlyklaryny nazara alýan žurnalistika boýunça Bitewi sebit gollanmasyna gol çekdiler. Bu resminama sebitdäki redaksiýalaryň öz işlerinde ulanyp biljek etiki we hünär standartlarynyň toplumyny öz içine alýar. Gatnaşyjylar onuň üstünde konferensiýanyň ikinji gününde toparlaýyn işlediler.

“Häzirki wagtda sebitdäki hyzmatdaşlygy hünär gatnaşyklarynyň we özara goldawyň netijeli ulgamyna öwürmek möhümdir” diýip, MJDC-niň direktory Saida Suleýmanowa konferensiýanyň açylyş dabarasynda aýtdy.

Merkezi Aziýanyň zenan žurnalistleri koalisiýasy 2024-nji ýylda Bişkekde geçirilen ilkinji konferensiýanyň netijesinde döredildi. Daşkentde geçirilen ikinji konferensiýada gatnaşyjylar koalisiýanyň 2026–2029-njy ýyllar üçin iş meýilnamasyny we geljekki bilelikdäki taslamalaryny ara alyp maslahatlaşdylar.

Guramaçylar Merkezi Aziýanyň zenan media hünärmenleri üçin niýetlenen “Women Media Awards Central Asia” sebit baýragy ugrunda bäsleşigiň başlanandygyny hem yglan etdiler. Baýrak media pudagyndaky hünär üstünliklerini, liderligi we sebitiň media ulgamynyň ösmegine goşan goşandy bilen tapawutlanan zenan hünärmenleri sylaglamaga gönükdirilendir.