Ýaponiýanyň Premýer-ministri Sigeru Isiba Türkmenistanyň Prezidenti Serdar Berdimuhamedow bilen Osaka şäherinde geçiriljek “EKSPO-2025” Bütindünýä sergisinde duşuşmaga sabyrsyzlyk bilen garaşýandygyny aýtdy. Bu barada Sigeru Isibanyň Türkmenistanyň döwlet Baştutanyna hoşşallyk bildirip ýollan hatynda bellenilýär.
Ýaponiýanyň Premýer-ministri özüniň wezipä bellenilmegi mynasybetli iberilen gutlaglara minnetdarlygyny bildirip, Türkmenistanyň kanunylyga esaslanýan erkin we açyk halkara gatnaşyklary berkarar etmekde Ýaponiýanyň möhüm strategiki hyzmatdaşy bolup durýandygyny belledi. Bu barada Türkmenistanyň resmi metbugaty çarşenbe güni habar berdi.
Şeýle hem hatda Premýer-ministr ykdysadyýet, ylym, medeniýet ýaly ulgamlarda iki ýurduň arasyndaky gatnaşyklaryň çuňlaşdyrylýandygyny nygtady.
“Şu ýylyň awgustynda geçirilmegi meýilleşdirilen sammit garaşylmadyk ýagdaýlar sebäpli yza süýşürildi. Ýaponiýa bilen Türkmenistanyň arasyndaky oňyn gatnaşyklary mundan beýläk-de pugtalandyrmak maksady bilen, şu ýyl 20 ýyllygy bellenilýän “Merkezi Aziýa-Ýaponiýa” dialogynyň çäklerinde Siziň Alyhezretiňiz bilen işjeň hyzmatdaşlyk etmegi maksat edinýärin” diýip, S.Isiba aýtdy.
Sigeru Isiba özüniň Premýer-ministr wezipesine bellenilmegi mynasybetli gutlaglar we hoşniýetli sözler üçin türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa hem hoşallyk bildirdi.
