Russiýanyň demir ýol düzümlerine hyzmat etmäge ýöriteleşen “Inžiniring Serwis-Putmaş” kompaniýasy Türkmenistanda bilelikdäki kärhanany açmagy meýilleşdirýär. Bu barada kompaniýanyň baş direktory Ýegor Lukýanow mälim etdi diýip, “RŽD-Partner.ru” habarlar agentligi sişenbe güni habar berdi.
“Biz Türkmenistandaky sergä ilkinji gezek gatnaşýarys we bilelikdäki kärhanany döretmek ýaly uzakmöhletleýin hyzmatdaşygy ösdürjekdigimize umyt bildirýäris” diýip, Ý.Lukýanow 26-27-nji noýabrda Aşgabatda geçirilen “Halkara ulag-üstaşyr geçelgeleri: özara arabaglanyşyk we ösüş-2024” atly maslahatyň çäklerinde aýtdy.
Onuň bellemegine görä, kompaniýa Türkmenistana demir ýol düzümlerine hyzmat etmek, şol sanda ýol tehnikalaryny abatlamak we döwrebaplaşdyrmak babatda hyzmatlaryň giň toplumyny hödürleýär. “Biz eýýäm gepleşikleri geçirdik. Biz bu ýerdäki ýol tehnikalary göz öňünde tutup, olara zerur hyzmatlaryň toplumyny hödürlemäge taýýardyrys” diýip, ol aýtdy.
Ý.Lukýanow ýakyn wagtda kompaniýanyň Türkmenistanda wekilhanasyny açjakdygyny, munuň üçin ýerli bazary has-da ösdürmegiň meýilnamasynyň işlenilip taýýarlanylandygyny mälim etdi.
Mundan öň, Russiýanyň “RŽD-Medisina” saglygy goraýyş tory Türkmenistandaky otly düzümleriň binýadynda hereket edýän lukmançylyk toplumyny işläp taýýarlamaga we gurmaga taýýardygyny aýtdy.
Neşirimize ýazylmak üçin:
WhatsApp: Biznes Türkmenistan
Telegram: Biznes Türkmenistan
Instagram: Biznes Türkmenistan
Dzen: Бизнес Туркменистан
