Aşgabatda geçirilýän Türkiýäniiň eksport harytlarynyň 11-nji sergisiniň çäklerinde Türkmenistanyň Ministrler Kabinetiniň Başlygynyň orunbasary Nökerguly Atagulyýewiň Türkiýäniň söwda ministri Ömer Bolat bilen duşuşygy boldy. Taraplar türk kompaniýalary tarapyndan potratçylyk taslamalary durmuşa geçirmek meselelerini maslahatlaşdylar. Bu barada Ömer Bolat özüniň sosial torlardaky hasabynda mälim edýär.
Taraplar ikitaraplaýyn söwdanyň möçberini 5 milliard dollara ýetirmek boýunça maksatlara ýetmek üçin görülmeli çäreleri, Maýa goýum işini özara giňeltmek we goramak hakynda ylalaşygy täzelemek işi barada maslahat etdiler. Hyzmatdaşlygy mundan beýläk-de berkitmegiň we giňeltmegiň mümkinçiliklerine aýratyn üns berildi.
Türkiýäniň söwda ministri köpsanly türk kompaniýalaryny we eksport edijilerini bir ýere ýygnan şu gezekki serginiň ýurduň dost-doganlyk döwleti bolan Türkmenistan bilen ykdysady hyzmatdaşlygy ösdürmegi maksat edinýändigini görkezýändigini belledi.
Türkiýäniň eksport harytlarynyň sergisi çarşenbe güni Aşgabat şäherindäki Türkmenistanyň Söwda-senagat edarasynyň sergiler merkezinde açyldy. Serginiň çäklerinde Türkmenistanyň Söwda-senagat edarasynyň we Türkiýäniň Daşary ykdysady aragatnaşyklar geňeşiniň (DEİK) bilelikde guramagynda Türkmenistan – Türkiýe işewürlik geňeşiniň mejlisi geçiriler.
