Türkmenistanyň Prezidenti Serdar Berdimuhamedow şenbe güni Aşgabatda Türkmenistana resmi sapar bilen gelen Eýranyň energetika ministri Abbas Aliabadini we Merkezi bankynyň başlygy Mohammad Reza Farzini kabul etdi. Bu barada Türkmenistanyň resmi metbugaty habar berýär.
Eýran wekiliýeti Prezident Masud Pezeşkianyň Türkmenistanyň döwlet Baştutanyna we türkmen halkynyň Milli Lideri Gahryman Arkadaga iberen mähirli salamyny ýetirip, ösüş ýoly bilen ynamly barýan Türkmenistan bilen hyzmatdaşlygynyň möhüm ähmiýetini belledi.
Türkmenistanyň Prezidenti Serdar Berdimuhamedow hoşniýetli sözler üçin hoşallyk bildirip, geçirilýän gepleşikleriň ýokary netijelere eýe boljakdygyna ynam bildirdi. Bellenilişine görä, bu gepleşikler ikitaraplaýyn gatnaşyklaryň berkidilmegine hyzmat edip, hyzmatdaşlyk üçin täze mümkinçilikleri açar.
Duşuşykda Türkmenistanyň we Eýranyň taryhyň çuň köklerinden alyp gaýdýan hoşniýetli goňşuçylyk gatnaşyklarynyň häzirki döwürde özara hormat goýmak we düşünişmek ýörelgeleri esasynda ösdürilýändigi bellenildi. Energetika, söwda-ykdysady we medeni-ynsanperwer ulgamlar hyzmatdaşlygyň möhüm ugurlary bolmagynda galýar.
Türkmenistanyň döwlet Baştutany, hususan-da, nebitgaz ulgamynda hyzmatdaşlygy mundan beýläk-de giňeltmäge Türkmenistanyň taýýardygyny belledi hem-de hyzmatdaşlygyň täze görnüşleriniň bilelikde gözlenilmeginiň we geljegi uly talamalaryň durmuşa geçirilmeginiň özara peýdalary getirjekdigine ynam bildirdi.
Türkmenistanyň Prezidenti energetika taslamalaryň durmuşa geçirilişinde ekologiýa taýdan howpsuz çemeleşmäniň ähmiýetine ünsi çekip, Türkmenistanyň ikitaraplaýyn hyzmatdaşlygy berkitmäge gönükdirilen teklipleri goldamaga açykdygyny tassyklady.
Duşuşygyň ahyrynda taraplar birek-birege üstünlikleri arzuw edip, dostluga we özara bähbitlilige esaslanýan hyzmatdaşlygyň mundan beýläk-de berkidiljekdigine ynam bildirdiler.
Şol gün Türkmenistanyň DIM-nde daşary işler ministri Raşid Meredowyň Eýran Yslam Respublikasynyň energetika ministri Abbas Aliabadiniň ýolbaşçylygyndaky wekiliýet bilen duşuşyk geçirildi.
