Türkmen halkynyň Milli Lideri, Türkmenistanyň Halk Maslahatynyň Başlygy şenbe güni Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň müdiriýetiniň mejlisini geçirdi. Onda Gaznanyň 2024-nji ýylda alyp baran işleriniň jemi hem-de howandarlyga mätäç çagalara goldaw bermegi işjeňleşdirmek boýunça çäreler ara alnyp maslahatlaşyldy.
Türkmenistanyň resmi metbugatynyň habar bermegine görä, mejlisiň dowamynda Gaznanyň şu ýylda alyp baran işleriniň jemlerine aýratyn üns berildi. Habar berlişine görä, Gaznanyň serişdeleriniň hasabyna, çagalaryň 500 sany lukmançylyk operasiýalary maliýeleşdirildi. Şonuň 261-si şu ýylda ýerine ýetirildi. Mundan başga-da, saglygy goraýyş, öňüni alyş barlaglary geçirilip, Türkiýä, Ukraina, Russiýa, Owganystana, Täjigistana we Palestina ynsanperwer kömekler iberildi.
Gurbanguly Berdimuhamedow adyndaky çagalar sagaldyş-dikeldiş merkeziniň direktory M.Öküzowa 2024-nji ýylda merkezde mümkinçiligi çäkli çagalaryň 985-sine dikeldiş bejergisiniň geçirilendigini aýtdy.
Mejlisde Gaznanyň üýtgedilen düzümi tassyklanylyp, bejeriş we önümçilik işlerine jogapkär täze wise-prezidentleriň wezipeleri döredildi. Bu çäreler Gaznanyň işiniň netijeliligini ýokarlandyrmaga we goldaw bermek işini giňeltmäge gönükdirilendir.
Gurbanguly Berdimuhamedow çagalaryň saglygynyň, maşgala gymmatlyklarynyň berkidilmegine we ynsanperwer işleriň durmuşa geçirilişine aýratyn ünsi çekip, Gaznanyň işini kämilleşdirmegi dowam etmegi tabşyrdy.
