Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow “Magtymguly Pyragynyň 300 ýyllygyna” atly ýubileý medaly hem-de beýik akyldar şahyr Magtymguly Pyragynyň 300 ýyllygy mynasybetli çykarylan ýadygärlik nyşanlar toplumy bilen sylaglanyldy. Bu barada “Watan” habarlar gepleşigi sişenbe güni habar berdi.
Degişli Permana Türkmenistanyň Prezidenti Serdar Berdimuhamedow gol çekdi.
Sylaglamak başlangyjy Türkmenistanyň Halk Maslahatynyň agzalary, iri jemgyýetçilik guramalaryň wekilleri hem-de raýatlar tarapyndan öňe sürüldi. Degişli sylaglar Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň mejlisinden soň türkmen halkynyň Milli Liderine gowşuryldy.
Türkmen halkynyň Milli Lideri dabaradaky çykyşynda Türkmenistanyň Prezidenti Serdar Berdimuhamedowa minnetdarlyk bildirip, Magtymguly Pyragynyň döredijiliginiň türkmen halkynyň ruhy mirasynyň möhüm bölegi bolup durýandygyny belledi. Türkmenistanyň Halk Maslahatynyň Başlygy gowşurylan medalyň ýurduň gülläp ösmegi ugrunda alyp barýan işlerde ruhlandyryjy itergi boljakdygyny nygtady.
“Magtymguly Pyragynyň 300 ýyllygyna” atly ýubileý medaly hem-de beýik akyldar şahyr Magtymguly Pyragynyň 300 ýyllygy mynasybetli çykarylan ýadygärlik nyşanlar toplumy bilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň agzalary hem-de daşary ýurtlaryň raýatlary sylaglandylar.
