Nebitgaz senagaty we geologiýa işgärleriniň hünär baýramy mynasybetli “Türkmennebit” döwlet konserni “Nebitgazdüýpliabatlaýyş” trestine “LGC360” kysymly sorujy we turba gysyjy 3 toplumy we awtobuslary gowşurdy. Bu tehnikalar Hytaý Halk Respublikasyndan satyn alyndy. Bu barada “Türkmenistan” gazetiniň duşenbe günündäki sanynda habar berilýär.
Türkmenistanyň döwlet Baştutanynyň başlangyjy esasynda satyn alnan täze tehnikalar nebitiň çykarylyşy duran ýa-da peselen guýularda abatlaýyş işlerini netijeli geçirmäge mümkinçilik berer. Mundan başga-da, ol guýularyň ulanylyşynda ýüze çykýan çylşyrymly tehniki meseleleri aradan aýyrmaga we işleriň gaýtadan ýola goýulmagyny üpjün etmäge ýardam eder.
Getirilen ýükleriň düzümine sorujy düzümler, awtosisternler, kiçi elektrik generatorlar, göçme ýaşaýyş öýleri we ätiýaçlyk şaýlary girýär.
Dabaraly gowşuryş çäresinden soň, tehnikalar we awtobuslar nebit ýataklaryna iberildi. Gatnaşyjylar nebitgaz pudagyna berýän goldawlary üçin döwlet Baştutanyna hoşallyk bildirdiler we Türkmenistanyň gülläp ösüşine we halkyň abadançylygyna gönükdirilen möhüm başlangyçlaryň durmuşa geçirilişinde mundan beýläk-de üstünlikleri arzuw etdiler .
14-nji dekabrda Türkmenistanda Nebitgaz senagaty we geologiýa işgärleriniň güni giňden baýram edildi. Hünär baýramy mynasybetli Nebitgaz toplumynyň medeni-işewürlik merkezinde ýurduň sungat ussatlarynyň gatnaşmagynda konsert geçirildi.
