“Türkmenistan” awiakompaniýasy Moskwadan Aşgabada 2 – 13-nji ýanwarda uçuşlary meýilleşdirilen ýolagçylar üçin alternatiw uçar gatnawyny işe girizdi. Awiakompaniýanyň resmi “Telegram” kanalynda habar berilmegine görä, uçar gatnawyny 2025-nji ýylyň 6-njy ýanwarynda sagat 23:55-de Moskwanyň Domodedowo howa menzilenden amala aşyrmak bellenilendir.
Uçar gatnawyny Stambul şäheriniň üsti bilen ýerine ýetirmek göz öňünde tutulýar. Uçar gatnawynyň Türkiýä çenli birinji tapgyry hyzmatdaş awiakompaniýa tarapyndan ýerine ýetiriler, ondan soň ýolagçylar “Türkmenistan” awiakompaniýasynyň uçarynda Aşgabada getiriler.
Uçar gatnawynda ýerleri tassyklatmak üçin ýolagçylara petek alan agent kompaniýalaryna ýüz tutmak we avia@itmgroup.ru elektron poçta salgysy arkaly habarnama ugratmak zerurdyr. Uçarda gitjekleri hasaba almak uçuşdan üç sagat öň başlanýar.
Awiakompaniýa uçuş meýilnamalary üýtgän ähli ýolagçylara täze uçar gatnawynyň deslapky sanawyna goşulmak üçin ýerleri öňünden bronlamagy mümkin boldugyça tizräk ylalaşmagy maslahat berýär.
