Türkmenistanyň Prezidenti Serdar Berdimuhamedow anna güni geçirilen Ministrler Kabinetiniň mejlisinde Arkadag şäherinde Çeper halyçylyk kärhanasynyň hem-de Türkmen halysynyň we el işleriniň milli muzeýiniň taslamasyny düzmek hem-de ony ýanaşyk ýerlerini abadanlaşdyryp gurmak barada Türkmenistanyň Prezidentiniň ýanyndaky Arkadag şäheriniň gurluşygy döwlet komitetine “Ajaýyp gurluşyk” hususy kärhanasy bilen şertnama baglaşmaga ygtyýar bermek hakynda Karara gol çekdi. Bu barada Türkmenistanyň resmi metbugaty habar berýär.
“Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda” kesgitlenen wezipeleri üstünlikli durmuşa geçirmek maksady bilen kabul edilen bu resminama şäheriň binagärlik keşbini özgertmäge we 2024 – 2052-nji ýyllarda şäheri ösdürmek boýunça Konsepsiýany amala aşyrmaga gönükdirilendir.
Karara laýyklykda, gurluşyk işlerine 2025-nji ýylyň ýanwar aýynda başlamak we desgalary 2027-nji ýylyň ýanwar aýynda ulanmaga bermek bellenilendir.
Mejlisde döwlet durmuşyna degişli başga-da birnäçe meseleler maslahatlaşylyp, olar boýunça degişli çözgütler kabul edildi.
