Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Gazagystanyň Prezidenti Kasym-Žomart Tokaýew telefon arkaly söhbetdeş boldular. Onda suw we ekologiýa gün tertibindäki meselelere aýratyn üns berildi diýip, Türkmenistanyň resmi metbugaty çarşenbe güni habar berdi.
Taraplar Merkezi Aziýada suw meselelerini çözmekde tagallalary birleşdirmegiň zerurdygyny, şunda halkara hukugyny, sebit ýurtlarynyň bähbitlerini hasaba almagyň we BMG-niň möhüm ähmiýetini bellediler. Gurbanguly Berdimuhamedow Er-Riýadda “Bitewi suw” atly Sammitde öňe süren başlangyçlary barada ýatlatdy we bilelikdäki taslamalaryň üstünlikli durmuşa geçiriljekdigine ynam bildirdi.
Söhbetdeşligiň dowamynda syýasy, ykdysady we medeni-ynsanperwer ulgamlardaky ikitaraplaýyn hyzmatdaşlygyň geljegine garaldy. Türkmenistan bilen Gazagystanyň arasyndaky gatnaşyklaryň okgunly ösýändigi, ýokary derejeli yzygiderli gepleşikleriň bolsa strategik hyzmatdaşlygy berkitmäge şert döredýändigi bellenildi.
Türkmen halkynyň Milli Lideri Gazagystanyň Araly halas etmegiň Halkara gaznasynda eden ýolbaşçylygyna ýokary baha berdi hem-de Türkmenistanyň bu ýurduň ekologiýa we howa başlangyçlaryny goldaýandygyny nygtady.
Gazanylan şertnamalary durmuşa geçirmek üçin taraplar iki ýurduň daşary işler ministrlikleriniň arasynda geňeşmeleri geçirmek boýunça ylalaşdylar.
Energetika, ulag we ynsanperwer hyzmatdaşlygyň möhüm meselelerini maslahatlaşmak üçin Astana şäherinde gepleşikleri guramak teklip edildi.
Telefon arkaly söhbetdeşligiň ahyrynda Gurbanguly Berdimuhamedow bilen Kasym-Žomart Tokaýew birek-biregi täze ýyl bilen gutlap, üstünlik we rowaçlyk arzuw etdiler.