Türkmenistanda Ykdysady hyzmatdaşlyk boýunça Hökümetara türkmen-ermeni toparynyň 10-njy mejlisi geçiriler. Bu çärä görülýän taýýarlyk barada Ministrler Kabinetiniň Başlygynyň orunbasary Batyr Amanow anna güni geçirilen Hökümet mejlisinde hasabat berdi diýip, Türkmenistanyň resmi metbugaty habar berýär.
Öňde boljak mejlisde söwda-ykdysady, ýangyç-energetika, maliýe-ykdysady, ylym-bilim, ýokary tehnologiýalar, sport, medeniýet, saglygy goraýyş, ulag-aragatnaşyk, maglumat ulgamlarynda, sebitara baglanyşyk, şertnama-hukuk ulgamy ýaly ugurlarda iki ýurduň arasyndaky hyzmatdaşlygyň geljegini maslahatlaşmak meýilleşdirilýär.
Wise-premýer Türkmenistanyň Prezidenti Serdar Berdimuhamedowa toparyň türkmen böleginiň düzümi barada teklibi hödürledi.
Türkmenistanyň döwlet Baştutany degişli mejlise ýokary taýýarlyk görmegiň zerurlygyna ünsi çekdi we toparyň düzümi babatda degişli teklibi hödürledi. Şeýle hem wise-premýer B.Amanowa ähli taýýarlyk işleriniň geçirilmegini üpjün etmek boýunça tabşyryklar berildi.
2025-nji ýylyň 13-nji martynda Türkmenistanyň Ermenistandaky Adatdan daşary we Doly ygtyýarly ilçisi Muhammetgeldi Aýazow Ermenistan Respublikasynyň Prezidenti Waagn Haçaturýan bilen duşuşyk geçirip, oňa türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň adyndan Türkmenistanyň hemişelik Bitaraplygynyň 30 ýyllygy mynasybetli halkara parahatçylyk we ynanyşmak forumyna gatnaşmaga çakylyk gowşurdy.
