Türkmenistanyň ykdysadyýetine daşary ýurt maýa goýumlaryny çekmek boýunça halkara forum (TEIF 2025) durnukly ösüş we energetika hyzmatdaşlygy ulgamynda Halkara parahatçylyk we ynanyşmak ýylynyň möhüm çäreleriniň biri bolar.
Forumy guraýjylaryň habar bermegine görä, OPEK-iň Baş sekretary Haýtam Al Gaýs, Halkara energetika agentliginiň Ýerine ýetiriji direktory Fatih Birol, Energiýanyň gaýtadan dikeldilýän çeşmeleri boýunça halkara agentliginiň (IRENA) ýolbaşçysy Françesko La Kamera, Gazy eksport ediji ýurtlaryň forumynyň Baş sekretary Mohamed Hamel we Energetika Hartiýasynyň Baş sekretary Atsuko Hirose çärä gatnaşjakdyklaryny tassykladylar.
Ýokary derejeli ýolbaşçylaryň “TEIF 2025” forumyna gatnaşmagy onuň ählumumy energetika dialogyny berkitmekdäki ähmiýetini nygtamak bilen, geljegiň energetika pudagynyň durnuklylygyny üpjün etmekde Türkmenistanyň eýeleýän ornuna gyzyklanmalaryň barha artýandygyna şaýatlyk edýär.
“TEIF 2025” täze energetika bileleşiklerini we durnukly ösüş maksatnamalaryny döretmekde möhüm waka bolar. Oňa eýýäm dünýäniň 30-dan gowrak ýurdundan 300-den gowrak wekiliň, şol sanda halkara maliýe düzümleriň, iri energetika we infrastruktura kompaniýalaryň wekilleriniň hem-de “ýaşyl” tehnologiýalar boýunça işläp taýýarlaýjylaryň gatnaşjakdygy tassyklanyldy.
Gatnaşyjylary hasaba almak işi 2025-nji ýylyň 15-nji aprelinde tamamlanýar.
