Türkiýäniň Stambul şäherinde 2025-nji ýylyň 21-22-nji iýunynda geçirilen Yslam Hyzmatdaşlyk Guramasynyň (YHG) Daşary işler ministrleriniň geňeşiniň mejlisinde Türkmenistanyň başlangyjy bilen “YHG-nyň we bütin dünýäde halkara parahatçylygy, howpsuzlygy we durnukly ösüşi üpjün etmekde we berkitmekde bitaraplyk syýasatynyň orny hakynda” atly kararnama biragyzdan kabul edildi.
Türkmenistanyň DIM-niň duşenbe güni habar bermegine görä, resminama syýasy-hukuk guraly hökmünde bitaraplygyň halkara we sebit durnuklylygyny berkitmäge ýardam edýändigini, döwletleriň arasynda parahatçylykly, dostlukly we özara bähbitli gatnaşyklaryň ösdürilmeginde möhüm orny eýeleýändigini nygtaýar.
Bu kararnamanyň YHG-nyň meýdançasynda kabul edilmegi, özara ynamy berkitmäge, dialogy ilerletmäge we netijeli halkara hyzmatdaşlygy ösdürmäge gönükdirilen Türkmenistanyň parahatçylyk dörediji syýasy strategiýasynyň halkara jemgyýetçiligi tarapyndan ykrar edilmeginiň we goldanylmagynyň aýdyň tassyknamasydyr diýlip, habarda bellenilýär.
Türkmenistanyň wekili forumda eden çykyşynda ýurduň daşary syýasatynyň möhüm ugurlarynyň biri hökmünde Yslam Hyzmatdaşlyk Guramasynyň çäklerinde hyzmatdaşlygy mundan beýläk-de ösdürmegiň, şeýle hem Guramanyň ähli agza döwletleri bilen netijeli gatnaşyklary güýçlendirmegiň çykyş edýändigini belledi.
Şeýle hem Yslam Hyzmatdaşlyk Guramasynyň Daşary işler ministrleriniň mejlisiniň çäklerinde Türkmenistanyň başlangyjy boýunça gurnalan “Parahatçylyk we ynanyşmak: Yslam dünýäsinde agzybirligiň we durnuklylygyň esaslary” atly tegelek stol maslahaty geçirildi.
29176-495x4352.jpg)
