SOCAR: Türkmenistan we Azerbaýjan dünýä energetika geçişinde amatly ýagdaýda ýerleşýär

Türkmenistan we Azerbaýjan sebit we ählumumy energetika geçişine işjeň gatnaşmak üçin amatly ýagdaýda ýerleşýär diýip, Azerbaýjanyň döwlet nebit kompaniýasy SOCAR-yň prezidenti Rowşan Nadžaf çarşenbe güni Aşgabatda geçirilen “Türkmenistanyň nebiti we gazy – 2025” (OGT-2025) halkara maslahatynda aýtdy.

Kompaniýanyň ýolbaşçysynyň bellemegine görä, dünýä energetika bazary çalt üýtgeýär. Köp ýurtlar durnukly geljege ýetmek maksady bilen zyňyndylary nol derejä ýetirmek ugrunda iş alyp barýar. Şu nukdaýnazardan tebigy gaza bolan isleg beýleki ýangyç görnüşlerine garanyňda has çalt ösýär, kömür paýynyň azalmagy bolsa gazy has arassa we ygtybarly alternatiwa öwürýär.

Onuň sözlerine görä, tebigy gaz pes uglerodly energetikanyň geçiş döwründe möhüm “köpri ýangyjy” hökmünde çykyş edýär, bu bolsa ekologik ösüşe we energetika howpsuzlygyna goşant goşýar. Şu babatda Azerbaýjan bilen Türkmenistanyň arasyndaky hyzmatdaşlygyň strategik ähmiýeti bar.

SOCAR-yň prezidenti türkmen tebigy gazynyň sebitde hem-de dünýä energetikasyndaky ornunyň artmagynyň ýurduň uglewodorod serişdelerini diwersifikasiýa etmek we durnukly ösüş ugrunda ýöredýän açyk syýasatyny görkezýändigini belledi.