Arkadag şäheriniň gurluşygynyň ikinji tapgyrynda medeni-durmuş we önümçilik maksatly 220-den gowrak desga gurulýar. Bu barada Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy Derýageldi Orazow sişenbe güni Arkadag şäherinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň ýolbaşçylygynda geçirilen iş maslahatynda habar berdi.
Derýageldi Orazow ikinji tapgyryň çäginde umumybilim berýän mekdepleriň, çagalar baglarynyň, şeýle hem 5, 7 we 9 gatly ýaşaýyş jaýlarynyň gurluşygynyň alnyp barylýandygyny belledi. Bu barada Türkmenistanyň resmi metbugaty habar berýär.
Maslahatyň dowamynda gurluşygyň ikinji tapgyrynyň ýerine ýetiriliş depginleri, ýaşaýyş we durmuş maksatly desgalaryň gurluşygy bilen baglanyşykly meseleler ara alnyp maslahatlaşyldy. Şeýle hem baýramçylyk dabaralaryna görülýän taýýarlyk işleri we ýaşaýjylaryň täze ýaşaýyş jaýlaryna göçürip getirmek işleri barada maglumatlar berildi.
Iş saparynyň dowamynda Gurbanguly Berdimuhamedow gurluşyk işleriniň alnyp barşy, şeýle hem ýol-ulag düzümine degişli desgalary, şol sanda Gökdepe we Akhan şaýollarynyň çatrygynda ýerleşýän köprini synlady.
Türkmen halkynyň Milli Lideri gurluşygyň ikinji tapgyrynyň çäginde önümçilik we durmuş maksatly binalaryň gurluşygynyň täze iş orunlaryny döretmekde hem-de ilatyň ýokary derejeli ýaşaýyş şertlerini gowulandyrmakda möhüm ähmiýet berýändigini belledi.
Maslahatyň ahyrynda gurluşyk işleriniň bellenilen möhletlerde tamamlanmagynyň we ýerine ýetirilýän işleriň ýokary hil derejesiniň üpjün edilmeginiň zerurdygy aýratyn nygtaldy.
