Türkmenistanyň Söwda we daşary ykdysady aragatnaşyklar ministri Nazar Agahanow Özbegistanyň Türkmenistandaky ilçisi Rawşanbek Alimow bilen duşuşyk geçirdi. Duşuşygyň dowamynda iki ýurduň kärhanalarynyň arasynda senagat hyzmatdaşlygyny ösdürmek bilen bagly meseleler ara alnyp maslahatlaşyldy.
Taraplar söwda-ykdysady hyzmatdaşlygy ösdürmegiň mümkinçiliklerini hem ara alyp maslahatlaşdylar. Bu barada “Dunyo” agentligi penşenbe güni habar berdi.
Gepleşikleriň dowamynda Özbegistan bilen Türkmenistanyň arasynda söwda-ykdysady ulgamda şu ýyl üçin meýilleşdirilen bilelikdäki çäreleriň meýilnamasyna hem garaldy.
Duşuşyga gatnaşyjylar 2025-nji ýylyň 25-nji fewralynda girizilen erkin söwda düzgüniniň özara haryt dolanyşygynyň durnukly ösmegine ýardam berýändigini bellediler.
Iki ýurduň serhetýaka sebitleriniň arasynda hyzmatdaşlygy ösdürmegiň möhüm guraly hökmünde garalýan “Şawat – Daşoguz” serhetýaka söwda zolagynyň işe girizilmegine aýratyn üns berildi.
Türkmenistan bilen Özbegistanyň arasyndaky söwda dolanyşygynyň möçberi 2025-nji ýylda 1,203 milliard ABŞ dollaryna barabar boldy.
