Russiýa Federasiýasynyň Federasiýa Geňeşiniň başlygynyň orunbasary Konstantin Kosaçýow penşenbe güni Türkmenistanyň Russiýadaky Adatdan daşary we Doly ygtyýarly ilçisi Esen Aýdogdyýew bilen duşuşyk geçirdi. Duşuşygyň dowamynda Konstantin Kosaçýow türkmen tarapyna Eýrandan rus raýatlaryny çykarmakda görkezilen guramaçylyk işleri we logistiki goldawy üçin minnetdarlyk bildirdi. Bu barada Russiýa Federasiýasynyň Federal Ýygnagynyň Federasiýa Geňeşiniň metbugat gullugy habar berýär.
Söhbetdeşligiň dowamynda taraplar ikitaraplaýyn hyzmatdaşlygyň ösüşini, şol sanda parlamentara hyzmatdaşlygy, şeýle-de sebit we halkara gün tertibiniň möhüm meselelerini ara alyp maslahatlaşdylar.
Mundan başga-da, taraplar şu ýyl Türkmenistanyň başlyklyk edýän Garaşsyz Döwletleriň Arkalaşygynyň (GDA) çäklerinde hyzmatdaşlyk meseleleri boýunça pikir alyşdylar.
Konstantin Kosaçýow türkmen tarapyndan taýýarlanan maksatnamanyň baý mazmunly gün tertibi bilen tapawutlanýandygyny we birnäçe parlamentara çärelerini öz içine alýandygyny aýtdy. Rus tarapy bu çäreleri hem ikitaraplaýyn ugur boýunça, hem-de GDA gatnaşyjy döwletleriň Parlamentara Assambleýasynyň çäklerinde goldamaga taýýardygyny bildirdi.
Ilçi Esen Aýdogdyýew türkmen tarapynyň başlyklyk etmeginde çäreleriň guralmagynda tejribe alyşmaga gyzyklanma bildirýändigini tassyklady we rus parlament agzalaryna türkmen halkynyň milli lideri, Türkmenistanyň Halk Maslahatynyň başlygy Gurbanguly Berdimuhamedowyň salamyny we iň gowy arzuwlaryny ýetirdi.
31368-495x4352.jpeg)
31368-90x604.jpeg)
