Türkmenistanyň Söwda we daşary ykdysady aragatnaşyklar ministrligi 2027-nji ýylda Serbiýanyň Belgrad şäherinde geçirilmegi meýilleşdirilýän “EKSPO 2027” Bütindünýä ýöriteleşdirilen sergisinde Türkmenistanyň pawilýonynyň taslamasyny düzmek we gurmak barada gaýtadan halkara bäsleşigini yglan etdi.
Duşenbe güni çap edilen “Biznes Reklama” gazetinde habar berilmegine görä, bäsleşige hödürlenilýän teklipler 2026-njy ýylyň aprel aýynyň 13-ne, sagat 18:00-a çenli kabul ediler.
Türkmenistanyň Ministrler Kabinetiniň Başlygynyň orunbasary Nökerguly Atagulyýew mart aýynyň 13-ne sanly ulgam arkaly geçirilen Ministrler Kabinetiniň nobatdaky mejlisinde “EKSPO 2027” Bütindünýä ýöriteleşdirilen sergisine Türkmenistanyň ýokary derejede gatnaşmagyny üpjün etmek boýunça ýerine ýetirilýän işler barada hasabat beripdi.
Hasabata görä, “Oýun adamzat üçin: sport we saz hemmeler üçin” mowzugynda geçiriljek sergä taýýarlygyň çäklerinde ýurduň milli pawilýonynyň gurluşyk-gurnama, enjamlaşdyryş we bezeg işleri boýunça zerur işler alnyp barylýar.
