Türkmenistanyň paýtagty Aşgabat şäherinde 18-nji aprelde maliýe sowatlylygyny ýokarlandyrmaga we maliýe gurallarynyň ulanylmagyny ösdürmäge gönükdirilen “FinFest Turkmenistan 2026” maliýe hyzmatlarynyň ikinji festiwaly geçiriler. Bu barada çäräniň gurnaýjylary “Biznes Türkmenistan” internet neşirine penşenbe güni habar berdi.
Çäre “Arkaç” işewürlik merkezinde geçirilip, maliýe pudagynyň wekillerini, işewürleri we jemgyýetçilik guramalarynyň hünärmenlerini bir ýere jemlär. Çäre “Durnukly Maliýe Merkezi” hem-de “Açyk ýürek” hojalyk jemgyýetleri tarapyndan gurnalmagynda we Türkmenistanyň Ykdysatçylar birleşmesiniň goldaw bermeginde geçiriler.
Festiwal ýurduň maliýe bazaryny ösdürmäge we durnukly ykdysady tejribeleri kemala getirmäge ýardam edýän milli bilim we aragatnaşyk meýdançasy hökmünde çykyş edýär. Bu çärä ýurduň banklarynyň, ätiýaçlandyryş, broker, audit we IT kompaniýalarynyň hünärmenleri, şeýle hem bilim merkezleriň ýolbaşçylary, telekeçiler we ýaşlar gatnaşarlar.
Çäräniň maksatnamasy maliýe ýarmarkasyny, plenar gepleşikleri, sessiýalary, hünärmenler bilen şahsy maslahatlary, ussatlyk sapaklaryny we amaly okuwlary öz içine alýar. Günüň dowamynda kompaniýalaryň sergi zolagy hereket edip, bu ýerde gelýänler maliýe önümleri we hyzmatlary bilen tanşyp bilerler.
“FinFest Turkmenistan 2026” kiçi we orta telekeçiligiň wekillerine, talyplara, täze başlan telekeçilere, maşgalalara we maliýe sowatlylygyny ýokarlandyrmaga gyzyklanma bildirýän ähli adamlar üçin niýetlenendir.
Festiwala gatnaşmak üçin orunlaryň çäklidigi sebäpli çärä gatnaşmaga isleg bildirýän taraplaryň öňünden hasaba durmagy zerurdyr.
