Türkmenistanda 2026-njy ýylyň 1-nji maýyndan raýat pasporty bilen çemeleşmek düzgünlerine degişli Administratiw hukuk bozulmalary hakyndaky kodekse girizilen üýtgetmeler güýje girýär. Türkmenistanyň Prezidenti Serdar Berdimuhamedowyň 2026-njy ýylyň 11-nji aprelinde gol çeken degişli Kanuny esasy resminamanyň abat saklanmagy we ony ulanmagyň tertibiniň berjaý edilmegi üçin jogapkärçiligi ýokarlandyrmaga gönükdirilendir. Bu barada Türkmenistanyň resmi metbugaty anna güni habar berdi.
Türkmenistanyň Administratiw hukuk bozulmalary hakynda kodeksiniň 370-nji maddasynyň täzelenen görnüşine laýyklykda, kanunçylykda indi resminamanyň bilmezden we bilgeşleýin zaýalanmagy bilen bagly ýagdaýlar anyk biri-birinden tapawutlandyrylýar. Pasportyň geleňsiz saklanylmagy sebäpli ýitirilmegi ýa-da zaýalanmagy üçin binýatlyk mukdaryň bir ölçeginden üç ölçegine çenli jerime bellenildi.
Şeýle hem resminama bilgeşleýin zaýalanylanda, jerimäniň möçberi üç ölçegden bäş binýatlyk mukdara çenli galdyryldy. Ozal bu iki hereket üçin hem kanun diňe duýduryşy ýa-da binýatlyk mukdaryň bir ölçeginden geçmeýän iň az jerimäni göz öňünde tutýardy.
Mundan başga-da, kodeksiň 371-nji maddasynyň birinji bölegindäki garamagynda ýa-da eýeçiliginde ýaşaýyş jaýlary ýa-da öýleri bolan ýuridik hem-de fiziki şahslar tarapyndan pasportsyz, şonuň ýaly-da pasportyna ýazgy edilmedik ýa-da hasaba alynmadyk adamlaryň ýaşamagyna rugsat berilmegi - binýatlyk mukdaryň üçüsinden altysyna çenli möçberde jerime salynmagyna çenli artdyryldy. Bu maddanyň ikinji bölegi boýunça bolsa tölegleriň çägi alty ölçegden on binýatlyk mukdara çenli artdyrylýar. Bu çäreler pasport düzgünini berjaý etmek meselelerinde tertip-düzgüni güýçlendirmäge gönükdirilendir.
Başgalaryň resminamalary bilen bikanun hereketler üçin jogapkärçiligi düzgünleşdirýän 372-nji maddasyna takyklandyrmalar girizildi. Indi kanun pasporty girew hökmünde kabul etmegi göni gadagan edýär. Resminamany bikanun alyp goýmak ýa-da ony borçnamalaryň üpjünçiligi hökmünde ulanmak üçin bellenen jerimeler kesgitlenildi: raýatlar üçin — bir ölçegden iki ölçege çenli, wezipeli şahslar üçin — bäş, ýuridik şahslar üçin bolsa alty binýatlyk mukdar möçberinde jerime bellenildi.
Bellemeli zat, maddanyň öňki görnüşi şeýle düzgün bozmalar üçin diňe duýduryş ýa-da 0,5 binýatlyk mukdara çenli jerime bilen çäklenýärdi. Täzelenen kadalar raýatlaryň hukuklaryny goramaga we şahsy resminamalar bilen bikanun çemeleşmeleriň öňüni almaga gönükdirilendir.
