Türkmen-amerikan işewürlik hyzmatdaşlygy boýunça assosiasiýasynyň (TABCA) resmi açylyş dabarasy we guramanyň ilkinji işewürlik forumy çarşenbe güni Waşingtonda geçirilip, oňa türkmen we amerikan kompaniýalarynyň 50-den gowrak wekili gatnaşdy.
Foruma gatnaşyjylar logistika, elektron söwda, maglumat tehnologiýalary, bilim, konsalting, söwda, hyzmatlar hem-de kiçi we orta telekeçilik bilen bagly beýleki ugurlary hödürlediler. Forum Türkmenistan bilen Amerikanyň Birleşen Ştatlarynyň telekeçileriniň arasynda göni B2B gatnaşyklaryny berkitmäge bagyşlandy. Bu barada Türkmenistanyň ABŞ-daky Ilçihanasy anna güni habar berdi.
Çäräniň dowamynda kompaniýalar özleriniň alyp barýan işleri bilen tanyşdyrdylar, hyzmatdaşlygyň mümkinçiliklerini ara alyp maslahatlaşdylar hem-de iki ýurtda iş alyp barmak boýunça amaly tejribe alyşdylar.
Türkmenistanyň Ilçihanasynyň wekilleri TABCA-nyň ýolbaşçylaryny we agzalaryny Assosiasiýanyň işe başlamagy bilen gutlap, onuň türkmen-amerikan söwda-ykdysady hyzmatdaşlygyny, aýratyn-da kiçi we orta telekeçilik ulgamynda ösdürmek üçin täze amaly meýdança hökmünde ähmiýetini nygtadylar.
Forumyň çäginde “Business-to-Business Networking” atly sessiýa hem-de Türkmenistan bilen ABŞ-nyň arasyndaky işewürlik gatnaşyklarynyň ösdürilmegine goşant goşan türkmen-amerikan telekeçilerini sylaglamak dabarasy hem geçirildi.
Habarda bellenilişi ýaly, TABCA-nyň döredilmegi iki ýurduň işewürlik jemgyýetleriniň arasynda has berk we göni gatnaşyklary ösdürmek ýolunda möhüm ädim boldy.
