“Land Rover” awtoulag gurluşyk boýunça britan kompaniýasy Türkmenistanyň awtoulag bazaryna çykmagyň mümkinçiliklerini öwrenýär. Bu barada kompaniýanyň wekilleri bilen türkmen wekiliýetiniň arasynda sişenbe güni Londonda geçirilen “UK–Turkmenistan B2B Exchange” işewürlik çäresiniň çäklerinde geçirilen gepleşikleriň dowamynda mälim edildi diýip, çäräni gurnaýjylar habar berdi.
Şeýle hem türkmen wekiliýeti “Primark” kompaniýasynyň, Kembrij uniwersitetiniň, Beýik Britaniýanyň Oba hojalygy we Genetika babatynda Tehnologiýalary (UKTAG) we “Advantix Ltd” kompaniýalarynyň wekilleri bilen duşuşdy. Bu kompaniýalaryň her biri hyzmatdaşlygyň anyk ugurlaryna düýpli gyzyklanma bildirdi. “Primark” dokma senagatynda hyzmatdaşlygyň ugurlaryny seljerýär, UKTAG agrosenagat tehnologiýalary boýunça teklipleri öňe sürýär, “Advantix Ltd” syýahatçylyk pudagyny ösdürmäge gyzyklanma bildirýär, Kembrij uniwersiteti bolsa bilim ulgamyndaky hyzmatdaşlygyň mümkinçiliklerine garaýar.
Şol gün türkmen wekiliýeti 12–14-nji maý aralygynda “ExCeL London” sergi merkezinde geçirilýän Beýik Britaniýanyň iň iri gurluşyk çäreleriniň biri bolan “UK Construction Week London 2026” sergisine hem gatnaşdy. Sergi gurluşyk materiallary, enjamlar we tehnikalar, hyzmatlar, gurluşykdaky sanly tehnologiýalar we emeli aň, modully çözgütler, şeýle hem gün energiýasy we energiýa saklaýyş ulgamlary ýaly alty ýöriteleşdirilen ugry öz içine alýar.
Şu ýyl geçirilýän “UK Construction Week London 2026” sergisi 600-den gowrak gatnaşyjy kompaniýany, 700-den gowrak çykyş edijini we 25 müňden gowrak gatnaşyjyny bir ýere jemledi. Bu sergä türkmen wekiliýetiniň gatnaşmagy döwrebap gurluşyk tehnologiýalaryna elýeterliligi üpjün edýär we ýurduň ykdysadyýetiniň ileri tutulýan pudaklarynyň birinde täze halkara hyzmatdaşlar bilen gatnaşyklary ýola goýmaga mümkinçilikleri giňeldýär.
