Birleşen Arap Emirlikleriniň Türkmenistandaky Adatdan daşary we Doly ygtyýarly Ilçisi Ahmed Al-Hameli türkmen kompaniýalarynyň wekilleri bilen aýratynlykda duşuşyklary geçirdi. Gepleşikleriň dowamynda düzümleýin taslamalar, bank tehnologiýalary we emeli aň ulgamynda hyzmatdaşlyk etmegiň geljegi uly bolan ugurlary maslahatlaşyldy. Bu barada Birleşen Arap Emirlikleriniň Türkmenistandaky Ilçihanasy habar berýär.
Awtomobil ýollarynyň we düzümleýin desgalaryň gurluşygy bilen meşgullanýan “Ojar Aziýa” kompaniýasynyň ýolbaşçysy bilen geçirilen duşuşykda taraplar gurluşyk pudagynda hyzmatdaşlyk etmegiň we düzümleýin taslamalary durmuşa geçirmegiň mümkinçiliklerini ara alyp maslahatlaşdylar.
Şeýle hem, Al-Hameli bank tehnologiýalary we mobil goşundylarda emeli aňyň ulanylyşy ugurlarynda iş alyp barýan “Ýyldyrym Bady” kompaniýasynyň wekilleri bilen duşuşdy. Gepleşikleriň dowamynda esasy üns tehnologiýalar we sanly çözgütler ulgamynda özara hyzmatdaşlyk etmegiň geljegine gönükdirildi.
Bu duşuşyklar Birleşen Arap Emirlikleri bilen Türkmenistanyň arasyndaky işewürlik gatnaşyklaryny giňeltmek ugrundaky tagallalaryň çäginde 20-nji maýda geçirildi.
