Türkmenistan bilen Türkiýäniň arasynda ykdysady hyzmatdaşlyk boýunça hökümetara toparyň (HEK) 9-njy mejlisiniň teswirnamasyna gol çekilip, ikitaraplaýyn ykdysady gatnaşyklary ösdürmäge gönükdirilen 71 maddalyk hereketler meýilnamasy tassyklandy. Bu barada Türkiýäniň Wise-prezidenti Jewdet Ýylmaz özüniň resmi X sahypasynda habar berdi.
Türkiýäniň Wise-prezidenti Jewdet Ýylmaz türkmen-türk hökümetara toparynyň 9-njy mejlisiniň çäklerinde Türkmenistanyň Ministrler Kabinetiniň Başlygynyň orunbasary Nökerguly Atagulyýew bilen dar we giň düzümli duşuşyklary geçirdi.
Türk tarapynyň bellemegine görä, gol çekilen teswirnama we hereketler meýilnamasy söwda, maýa goýumlar, energetika, ulag, bilim we senagat ugurlarynda hyzmatdaşlygy giňeltmek boýunça anyk ädimleri öz içine alýar.
Taraplar bilelikdäki önümçilikleri ýola goýmak, maýa goýum taslamalaryny durmuşa geçirmek hem-de üçünji ýurtlaryň bazarlarynda hyzmatdaşlygy ösdürmek baradaky ygrarlylygyny hem tassykladylar.
Türkiýe bilen Türkmenistan ykdysady hyzmatdaşlygy ikitaraplaýyn gatnaşyklaryň esasy ugurlarynyň biri hökmünde görýärler. Ozal iki ýurduň arasyndaky özara söwda dolanyşygynyň möçberini ýakyn ýyllarda 5 milliard ABŞ dollaryna ýetirmek göz öňüne tutulypdy.
Duşuşygyň dowamynda Jewdet Ýylmaz türkmen tarapyna çäräniň ýokary derejede guralandygy üçin hoşallyk bildirip, türkmen-türk hyzmatdaşlygynyň mundan beýläk-de ösdürilmegine goşulýan goşandyň ähmiýetini aýratyn nygtady.
Şol gün Jewdet Ýylmaz Türkmenistanyň Prezidenti Serdar Berdimuhamedow bilen hem duşuşdy. Taraplar türkmen-türk hyzmatdaşlygyny mundan beýläk-de pugtalandyrmagyň we ykdysadyýetiň dürli pudaklarynda özara gatnaşyklary giňeltmegiň geljekki mümkinçiliklerini ara alyp maslahatlaşdylar.
