Türkmen gallaçylary 2026-njy ýylyň bugdaý oragynda Watan harmanyna 1 million 400 müň tonnadan gowrak bugdaý hasylyny tabşyryp, şertnamalaýyn borçnamalaryny üstünlikli ýerine ýetirdiler. Şunuň bilen baglylykda, Türkmenistanyň Prezidenti Serdar Berdimuhamedow ýurduň gallaçylaryny we ähli oba hojalyk işgärlerini gazanylan zähmet ýeňşi bilen gutlady. Bu barada Türkmenistanyň resmi metbugaty habar berdi.
Döwlet Baştutany gutlagynda bu üstünligiň daýhan birleşikleriniň, daýhan hojalyklarynyň, hususy önüm öndürijileriň, mehanizatorlaryň, alymlaryň we beýleki oba hojalyk işgärleriniň yhlasly zähmetiniň netijesi bolandygyny belledi. Şeýle hem ol döwlet tarapyndan gallaçylaryň netijeli zähmet çekmegi üçin mundan beýläk hem ähli zerur şertleriň dörediljekdigini nygtady.
Türkmenistanyň Prezidenti Serdar Berdimuhamedow häzirki döwürde oba hojalygyny ösdürmek, hasyllylygy ýokarlandyrmak we pudagyň maddy-enjamlaýyn binýadyny berkitmek boýunça giň gerimli işleriň alnyp barylýandygyny aýtdy. Şeýle hem daýhanlaryň döwrebap oba hojalyk tehnikalary, mineral dökünler hem-de beýleki zerur serişdeler bilen üpjün edilýändigi bellenildi.
Habarda bellenilişi ýaly, Türkmenistanda bugdaý hasylyny ýygnamak, saklamak we gaýtadan işlemek üçin galla kabul ediş kärhanalary, döwrebap elewatorlar, ammarlar we degirmen toplumlary hereket edýär. Şeýle hem bugdaýyň hasyllylygyny ýokarlandyrmak maksady bilen onuň täze sortlaryny döretmek we tohumçylyk işlerini kämilleşdirmek boýunça ylmy-barlag işleri dowam etdirilýär.
Türkmenistanyň Prezidenti gutlagynyň ahyrynda gallaçylara, oba hojalyk işgärlerine, kombaýnçylara we hasyly ýygnamaga gatnaşan ähli zähmetkeşlere berk jan saglyk, maşgala abadançylygyny hem-de alyp barýan işlerinde täze üstünlikleri arzuw etdi.
