Gyrgyzystanyň Prezidenti Sadyr Žaparow Merkezi Aziýa ýurtlaryna syýahat edýän daşary ýurt raýatlary üçin bitewi syýahatçylyk wizasyny döretmegi teklip etdi. Ol Merkezi Aziýa döwletleriniň Baştutanlarynyň we Azerbaýjanyň Prezidentiniň resmi däl konsultatiw duşuşygynda bu başlangyjyň ähmiýetini belläp geçdi. Bu barada Gyrgyzystan Respublikasynyň "Kabar" milli habarlar agentligi habar berdi.
Duşuşygyň dowamynda Sadyr Žaparow sebitde syýahatçylyk hyzmatdaşlygyny ösdürmek üçin uly mümkinçilikleriň bardygyny belläp, umumy taryhyň, medeni mirasyň we däp bolan gatnaşyklaryň ýurtlaryň özara hyzmatdaşlygy üçin esas bolup hyzmat edýändigini aýtdy.
Şeýle hem Gyrgyzystanyň Prezidenti Merkezi Aziýa bilen Azerbaýjanyň gadymy şäherleri, Beýik Ýüpek ýolunyň taryhy ýadygärlikleri, dag we köl tebigaty, milli däp-dessurlary hem-de baý medeni dürlüligi öz içine alýan özboluşly mirasa eýedigini nygtady. Şunuň bilen baglylykda, Gyrgyzystan Merkezi Aziýa ýurtlaryna gelýän daşary ýurt raýatlary üçin bitewi syýahatçylyk wizasyny döretmegi teklip etdi.
Sadyr Žaparow bu başlangyjy goldandyklary üçin Özbegistanyň Prezidenti Şawkat Mirziýoýewe we Gazagystanyň Prezidenti Kasym-Žomart Tokaýewe minnetdarlyk bildirip, degişli ylalaşylan çözgütleri işläp taýýarlamak maksady bilen daşary syýasat edaralaryna geňeşmeleri işjeňleşdirmegi teklip etdi. Şeýle hem Sadyr Žaparow Türkmenistana Merkezi Aziýa döwletleriniň Baştutanlarynyň konsultatiw duşuşyklaryna başlyklyk edýändigi üçin hoşallyk bildirip, 2026-njy ýylyň 8-nji oktýabrynda Awazada geçiriljek nobatdaky duşuşygyň üstünlikli guralmagyna Gyrgyzystanyň goşant goşmaga taýýardygyny aýtdy.
