26-27-nji aprelde Türkiýäniň gündogarynda ýerleşýän Erzurum şäherinde Palandöken ykdysady forumy geçiriler. Bu şäher 2025-nji ýylda Ykdysady Hyzmatdaşlyk Guramasynyň syýahatçylyk boýunça paýtagty diýlip yglan edildi diýip, Türkiýäniň Türkmenistandaky ilçihanasy habar berýär.
“Akylly dünýäde adalatly geljek: intellektual ykdysadyýet we ählumumy deňlik” forumyň esasy şygary bolar. Çärä YHG-a agza ýurtlaryň hökümetleriniň, ylmy we işewürlik jemgyýetçilikleriniň, Beýik Britaniýanyň, ABŞ-nyň, Fransiýanyň, Şweýsariýanyň we BAE-niň wekilleri gatnaşarlar.
Çäräniň maksatnamasy sanly tehnologiýalaryň we emeli aňyň ählumumy ykdysadyýete ýetirýän täsirine bagyşlanan bäş sany esasy we iki ýörite mejlisleri öz içine alýar.
Forum döwletleriň arasynda hyzmatdaşlygy giňeltmäge, ählumumy wehimleriň abanýan şertlerinde durnukly ösüşe innowasion çemeleşmeleri ilerletmäge gönükdirilendir.
Şu ýylyň aprel aýynda Arkadag şäherinde Ykdysady Hyzmatdaşlyk Guramasynyň durnukly ösüş boýunça ministrler derejesindäki ilkinji forumy geçiriler.
