Türkmenistanyň Prezidenti Serdar Berdimuhamedow Şeýh Haled bin Mohammed bin Zaýed Al Nahaýýany Abu-Dabiniň Mirasdüşer Şazadasy hökmünde bellenilmegi mynasybetli tüýs ýürekden gutlady. Bu barada Türkmenistanyň resmi metbugaty anna güni habar berdi.
“Türkmenistan bilen Birleşen Arap Emirlikleriniň arasyndaky däbe öwrülen dost-doganlyk gatnaşyklary özara düşünişmegiň we ysnyşykly hyzmatdaşlygyň ýokary derejesi bilen tapawutlanýar” diýip, Döwlet Baştutanymyz öz hatynda belledi we bu gatnaşyklaryň iki halkyň bähbidine mundan beýläk-de ösdüriljekdigine pugta ynam bildirdi.
Türkmenistanyň Prezidenti Serdar Berdimuhamedow şu mümkinçilikden peýdalanyp, Abu-Dabiniň Mirasdüşer Şazadasy Şeýh Haled bin Mohammed bin Zaýed Al Nahaýýana tüýs ýürekden berk jan saglyk, bagtyýarlyk we asylly başlangyçlarynda üstünlikleri arzuw etdi.
Şeýle hem türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Şeýh Haled bin Mohammed bin Zaýed Al Nahaýýana Abu-Dabiniň Mirasdüşer Şazadasy hökmünde bellenilmegi mynasybetli ýürekden gutlaglaryny we iň gowy arzuwlaryny iberdi.
