Türkmenistanyň “Deňiz söwda floty” ýapyk görnüşli paýdalar jemgyýeti daşary ýurt gämilerini Türkmenbaşy Halkara Deňiz portunyň gämi duralgalaryna hem-de porta barmazdan 78-nji belgili meýdançanyň reýdlerinde dizel ýangyjy bilen bunkerleme hyzmatyny hödürleýär.
“Deňiz söwda floty” ÝGPJ-niň çarşenbe güni beren habaryna görä, bunkerleme hyzmatynyň 78-nji belgili meýdançanyň reýdlerinde amala aşyrylmagy syýahat wagtyny ep-esli tygşytlamaga we bunkerlemeden soň bellenen ugra tarap hereketi dowam etdirmäge mümkinçilik berýär.
Habarda bellenilişi ýaly, gämileri dizel ýangyjy bilen bunkerleme hyzmaty “Serpaý” tirkeg gämisi tarapyndan ýerine ýetirilýär.
Mundan başga-da “Serpaý” tirkeg gämisi daşary ýurt gämilerini arassa agyz suwy we azyk önümleri bilen üpjün etmäge hem ukyplydyr.
Türkmenistanyň “Deňiz söwda floty” ÝGPJ-niň gämileri tarapyndan 2023-nji ýylyň ýanwar-iýun aýlarynda 1150,50 müň tonna ýük daşaldy we ýük daşamalarynyň umumy mukdary 2022-nji ýylyň degişli döwürleri bilen deňeşdirilende 31,4% ýokarlandy.
