Türkmenistanyň Belgiýadaky ilçisi Sapar Palwanow çarşenbe güni Brýusselde Ýewropanyň Energetika Barlag Bileleşiginiň (EERA) Baş sekretary Adel El Gammal bilen duşuşyk geçirdi.
Türkmenistanyň Belgiýadaky ilçihanasynyň habar bermegine görä, duşuşygyň dowamynda pes uglerodly tehnologiýalary taýýarlamaga işjeň gatnaşýan Ýewropa Energetika Barlag Bileleşigi (EERA) bilen Türkmenistanyň ylmy-barlag institutlarynyň arasynda bolup biljek hyzmatdaşlyk ara alnyp maslahatlaşyldy.
Baş sekretar öz gezeginde energiýa barlaglary we innowasiýa pudagynda bilelikdäki başlangyçlara we bilimi paýlaşmaga gyzyklanma bildirilýändigini aýtdy.
Mundan başga-da, taraplar Pariž ylalaşygy bilen baglanyşykly global tendensiýany we uglerod zyňyndylaryny azaltmagyň zerurlygyny göz öňünde tutup, iki tarapyň hem howanyň üýtgemegi bilen bagly maksatlara üstünlikli ýetmegi üçin hyzmatdaşlyk strategiýalaryna garadylar.
Ýewropanyň Energetika Barlag Bileleşigi energetika pudagynda hyzmatdaşlygy we barlaglary utgaşdyrmak maksady bilen barlag guramalary we uniwersitetleri birleşdirilen ulgam bolup durýar. EERA 2008-nji ýylda döredildi we ol Ýewropanyň 30 ýurdundan 250-den gowrak barlag guramalary birleşdirýär.
