Türkmenistanyň Prezidenti Serdar Berdimuhamedow çarşenbe güni Aşgabatda Azerbaýjanyň ykdysadyýet ministri Mikail Jabbarowy kabul etdi. Bu barada Türkmenistanyň resmi metbugaty habar berdi.
Duşuşygyň dowamynda Türkmenistanyň Döwlet Baştutany Azerbaýjanyň ykdysadyýet ministriniň şu gezekki saparynyň barşynda geçiriljek duşuşyklaryň, gepleşikleriň iki ýurduň arasyndaky ykdysady hyzmatdaşlygyň ösdürilmegine uly goşant goşjakdygyna ynam bildirdi.
“Biziň ýurtlarymyz sebit we halkara guramalaryň, ozaly bilen, BMG-niň çäklerinde üstünlikli hyzmatdaşlyk edýärler. Bu hyzmatdaşlygyň dowamynda Durnukly ösüş maksatlaryna ýetmäge hem-de ählumumy howpsuzlygyň üpjün edilmegine gönükdirilen başlangyçlary özara goldaýarys” diýip, Türkmenistanyň Döwlet Baştutany aýtdy.
Şeýle hem duşuşygyň barşynda söhbetdeşler deňhukuklylyk, ynanyşmak, özara düşünişmek esasynda guralýan döwletara dialogyň ýetilen ýokary derejesini kanagatlanma bilen bellediler.
Mundan başga-da, Türkmenistanyň Prezidenti Serdar Berdimuhamedow çarşenbe güni Azerbaýjanyň Türkmenistanda täze bellenen Adatdan daşary we Doly ygtyýarly ilçisi Gismat Gozalowy kabul etdi. Gismat Gozalow Türkmenistanyň Döwlet Baştutanyna ynanç hatyny gowşurdy.
